Ua hoˈi o Iesu i nia i te raˈi

I Galilea, ua farerei Iesu i ta ˈna mau pǐpǐ. Ua horoa ˈtura oia ia ratou i te hoê faaueraa faufaa roa: ‘A haere e faariro i te taata o te mau nunaa atoa ei pǐpǐ na ˈu. A haapii ia ratou i te mau mea atoa ta ˈu i haapii atu ia outou e a bapetizo ia ratou.’ I muri iho, ua fafau oia: ‘A haamanaˈo, tei pihai iho vau ia outou e a muri noa ˈtu.’

E 40 mahana i muri aˈe i to ˈna tia-faahou-raa, ua fa o Iesu i hanere o ta ˈna mau pǐpǐ i Galilea e i Ierusalema. Ua haapii atu oia ia ratou i te mau haapiiraa faufaa roa e ua faatupu oia i e rave rahi semeio. I muri iho, ua farerei o Iesu i ta ˈna mau aposetolo no te taime hopea i te mouˈa Oliveta. Ua na ô oia: ‘Eiaha e faarue ia Ierusalema. A tiai noa i ta te Metua i fafau mai.’

Aita ta ˈna mau aposetolo i taa i te auraa o ta ˈna i parau. Ua ani atura ratou: ‘I teie nei oe e riro ai ei Arii o Iseraela?’ Ua pahono atura o Iesu: ‘E ere te taime no Iehova no te faariro ia ˈu ei Arii. Fatata outou i te noaa i te puai o te varua moˈa e e riro outou ei ite no ˈu. A haere e poro i Ierusalema, i Iudea, i Samaria e tae atu ai i te mau vahi atea roa ˈˈe o te fenua.’

I muri iho, ua afaihia o Iesu i nia i te raˈi e ua vehîhia oia e te hoê ata. Ua tamau te mau pǐpǐ i te hiˈo i te raˈi. Ua moˈe râ o Iesu.

Ua faarue te mau pǐpǐ i te mouˈa Oliveta no te haere i Ierusalema. Ua tamau ratou i te putuputu mai i te hoê piha i nia e i te pure. Ua tiai ratou i te taime e horoa ˈi Iesu rahi atu â mau faaueraa.