A feruri na mua e a haa ma te paari

I to Iesu faatiaraa aˈenei i te faahohoˈaraa o te tamaiti tei moˈe na, eita e ore e ua putapû te tahi mau titau tute, papai parau e Pharisea e ua ineine te Atua i te faaore i te hara a te feia rave hara tei tatarahapa. (Luka 15:1-7, 11) I muri iho paraparau atura Iesu i ta ˈna mau pǐpǐ, a faatia ˈi i te tahi atu faahohoˈaraa. O te hoê ïa taata taoˈa rahi tei faaroo e ua rave ta ˈna tiaau i te tahi ohipa tano ore.

Ua parihia te tiaau i te haamâuˈaraa i te faufaa a to ˈna fatu. Parau atura te fatu e e tihati oia i te tiaau. Haapeapea ihora te tiaau: “E nafea râ vau, e tihati hoi to ˈu fatu ia ˈu? Eita e haere ia ˈu ia utaru, mea haama atoa ia taparu haere i te moni.” Feruri ihora oia: “Ua ite au eaha ta ˈu e rave ia farii mai te taata ia ˈu i ǒ ratou ua ere anaˈe au i to ˈu toroa tiaau.” Titau ihora oia i te feia tei tarahu i to ˈna fatu e ui atura: “Ehia ta oe i tarahu i to ˈu fatu?”—Luka 16:3-5.

Pahono maira te taata tarahu matamua: “Hoê hanere tura hinu olive.” Piri ïa i te 2 200 litera. E faaapu olive rahi paha ta ˈna aore ra e hoo atu oia i te hinu. Na ô atura te tiaau: “A rave i ta oe parau faaau, a parahi e a papai haaviti e 50 [1 100 ïa litera].”—Luka 16:6.

Ui ihora te tiaau i te tahi atu: “E oe, ehia ta oe tarahu?” Pahono maira oia: “Hoê hanere pute sitona.” Piri ïa i te 17 000 kilo. Na ô atura te tiaau: “A rave i ta oe parau faaau e a papai e 80.” Ua faaiti mai ïa oia i te tarahu.—Luka 16:7.

Na te tiaau noa iho â e haapao ra i te faufaa a to ˈna fatu. E tiaraa ïa to ˈna e faaiti mai i ta taua mau taata ra i tarahu i te fatu. Ma te na reira, te faahoa ra oia i te feia e nehenehe e hamani maitai ia ˈna ia ere oia i ta ˈna ohipa.

Faarooroo atura te fatu i te ohipa i tupu. Noa ˈtu e pau rahi oia, ua faahiahia oia i te tiaau e ua haapopou ia ˈna, “noa ˈtu e e taata parau-tia ore, no to ˈna haaraa ma te paari.” Na ô atura Iesu: “E rahi aˈe te paari o te mau tamaiti o teie faanahoraa o te ao nei i to te mau tamaiti o te maramarama ia ohipa ratou i nia ia vetahi ê.”—Luka 16:8.

Aita Iesu e turu ra i te huru raveraa a te tiaau aore ra te ohipa taviri. Eaha ïa ta ˈna haapiiraa? Aˈo ihora oia i te mau pǐpǐ: “A imi i te hoa no outou maoti te mau taoˈa a teie nei ao parau-tia ore. E ia moˈe taua mau taoˈa ra, e fariihia mai ïa outou . . . i roto i te mau nohoraa mure ore.” (Luka 16:9) Te haapiiraa i ǒ nei, te haroˈaroˈa ïa e te haaraa ma te paari. Ia faaohipa hoi te mau tavini a te Atua, “te mau tamaiti o te maramarama,” i ta ratou mau taoˈa ma te paari, a feruri ai i te tau mure ore a muri aˈe.

O te Atua ra o Iehova e ta ˈna Tamaiti anaˈe te nehenehe e farii i te hoê taata i roto i te Faatereraa arii i te raˈi aore ra i te paradaiso i te fenua nei i raro aˈe i taua Faatereraa arii ra. Ia rohi ïa tatou i te faahoa ˈtu ia raua, ma te faaohipa i ta tatou mau taoˈa no te turu i te mau faufaa a te Faatereraa arii. Moˈe aore ra pau noa ˈtu te auro, te ario, e te tahi atu mau taoˈa, e fanaˈo iho â tatou i te ora mure ore a muri aˈe.

Ua parau atoa Iesu e te feia o te haapao maitai e o te faaohipa i ta ratou mau faufaa aore ra taoˈa atoa, e haapao maitai atoa ïa i te mau mea faufaa aˈe. Na ô atura Iesu: “No reira, ua faaite outou e aita outou i haapao maitai i te mau taoˈa a teie nei ao parau-tia ore, eita atoa ïa e horoahia ˈtu te mau taoˈa mau [mai te mau faufaa a te Faatereraa arii].”—Luka 16:11.

Te faaite ra Iesu i ta ˈna mau pǐpǐ e mea rahi te anihia ia ratou ia fariihia ratou “i roto i te mau nohoraa mure ore.” Eita te hoê tavini mau a te Atua e nehenehe e tavini atoa i te mau taoˈa a teie nei ao parau-tia ore. Na ô atura Iesu: “E ore e tia i te hoê tavini ia tavini e piti fatu, e hae hoi oia i te hoê e e here oia i te tahi atu, aore ra e faatura oia i te hoê e e vahavaha oia i te tahi atu. E ore e tia ia outou ia tavini i te Atua e te moni.”—Luka 16:9, 13.