Haamataraa Iesu i te faariro i te taata ei pǐpǐ

I muri aˈe e 40 mahana i te medebara e hou a hoˈi ai i Galilea, e haere faahou Iesu ia Ioane ra, tei bapetizo na ia ˈna. A piri atu ai Iesu ia ˈna, na ô atura Ioane i te feia i reira, a tohu ai ia Iesu: “A hiˈo na i te Arenio a te Atua o te faaore roa i te hara a to te ao nei! I parau na hoi au no ˈna: ‘Na muri mai ia ˈu te haere mai nei te hoê taata o te na mua ˈtu ia ˈu, no te mea i vai na oia na mua ˈˈe ia ˈu.’” (Ioane 1:29, 30) Noa ˈtu e mea paari rii aˈe Ioane ia Iesu, ua ite o ˈna e i vai na Iesu na mua ˈˈe ia ˈna ei varua i nia i te raˈi.

Tau hebedoma na mua ˈtu, i to Iesu haereraa ia Ioane ra ia bapetizohia oia, e au ra e aita â i papu atura ia Ioane e o Iesu te Mesia. Ua parau hoi Ioane: “Aita vau i matau ia ˈna, te tumu râ i bapetizo ai au i te taata i roto i te pape, ia itehia ïa oia e to Iseraela.”—Ioane 1:31.

Faatia atoa ˈtura Ioane i te feia e faaroo ra ia ˈna i te ohipa i tupu i to ˈna bapetizoraa ia Iesu: “Ua ite au i te varua moˈa i te pouraa mai mai te uupa ra mai nia mai i te raˈi, e faaea ihora i nia ia ˈna. Aita vau i matau ia ˈna, ua parau mai râ te Atua tei tono mai ia ˈu e bapetizo i te taata i roto i te pape: ‘Ia ite oe i te varua moˈa ia pou mai e ia faaea i nia ia ˈna, o ˈna ïa te bapetizo i te taata i te varua moˈa.’ E ua ite au i te reira, e ua faaite au e o ˈna te Tamaiti a te Atua.”—Ioane 1:32-34.

Ananahi aˈe, te tia ra Ioane e toopiti o ta ˈna mau pǐpǐ i to Iesu haere-faahou-raa ˈtu. Na ô ihora Ioane: “A hiˈo i te Arenio a te Atua!” (Ioane 1:36) Pee ihora na toopiti pǐpǐ a Ioane Bapetizo ia Iesu. O Anederea te iˈoa o te hoê. E te tahi atu, o te taata ïa tei papai i teie faatiaraa, o Ioane atoa te iˈoa. E au ra e e taeae fetii taua Ioane ra no Iesu. E tamaiti oia na Salome, e tuahine paha no Maria, e o Zebedaio ta ˈna tane faaipoipo.

Fariu atura Iesu i muri e ite atura ia Anederea raua Ioane e pee mai ra ia ˈna. Ui atura oia: “Eaha ta orua e hinaaro ra?”

Na ô maira raua: “Rabi, ihea oe e faaea ˈi?”

Pahono atura Iesu: “A haere mai, a hiˈo.”—Ioane 1:37-39.

Tei te area hora maha i te ahiahi, e ua faaea Anederea raua Ioane ia Iesu ra e po noa ˈtu. No to Anederea oaoa rahi, tii ihora oia i to ˈna taeae o Simona, pii-atoa-hia Petero, e na ô atura ia ˈna: “Ua itehia ia mâua te Mesia.” (Ioane 1:41) Aratai atura Anederea ia Petero ia Iesu ra. Ia au i te tahi mau ohipa i tupu i muri iho, te manaˈohia ra e ua tii atoa Ioane i to ˈna taeae Iakobo e ua aratai ia ˈna ia Iesu ra. Aita râ Ioane i papai i teie parau i roto i ta ˈna faatiaraa.

Ananahi aˈe, farerei ihora Iesu ia Philipa no Betesaida, te hoê oire i te pae apatoerau o te miti o Galilea. Te oire atoa ïa o Anederea raua Petero. Parau atura Iesu ia Philipa: “A pee mai ia ˈu.”—Ioane 1:43.

Farerei atura Philipa ia Natanaela, pii-atoa-hia Baretolomea, e na ô atura: “Ua itehia ia matou Iesu te tamaiti a Iosepha no Nazareta. No ˈna hoi te parau i roto i te ture a Mose e te mau papai a te mau peropheta.” Parau maira râ Natanaela, e feaa ra te manaˈo, ia Philipa: “E taata maitai anei te haere mai Nazareta mai?”

Parau onoono atura Philipa: “A haere mai, a hiˈo.” Ite ihora Iesu ia Natanaela i te haereraa mai e parau ihora: “Teie te hoê Iseraela aita roa e haavare i roto ia ˈna.”

Ui maira Natanaela: “Mea nafea to oe iteraa?”

Pahono atura Iesu: “Hou Philipa a pii ai ia oe, ua ite au ia oe i raro aˈe i te tumu suke.”

Na ô maira Natanaela ma te maere: “Rabi, o te Tamaiti a te Atua oe, e Arii oe no Iseraela.”

Ui atura Iesu: “Te tiaturi nei oe ia ˈu no to ˈu parauraa ˈtu e ua ite au ia oe i raro aˈe i te tumu suke?” Na ô atura Iesu: “E ite oe i te mau mea rahi aˈe i teie.” Fafau atura Iesu: “E parau mau ta ˈu e parau atu: E ite outou i te raˈi tei matara e ia pou mai te mau melahi a te Atua i te Tamaiti a te taata nei e ia haere i nia.”—Ioane 1:45-51.

I muri iho, faarue maira Iesu e ta ˈna mau pǐpǐ apî i te peho no Ioridana e haere atura i Galilea.