No ǒ mai iho â anei te parau apî oaoa i te Atua?

1. O vai te Fatu o te Bibilia?

Tei roto i te Bibilia te parau apî oaoa e e ora te taata e a muri noa ˈtu i te fenua. (Salamo 37:29) No te papai i na 66 buka rii o te Bibilia, ua faaohipa te Atua e 40 tiahapa tane taiva ore. Na Mose i papai i na buka matamua e pae a 3 500 matahiti aˈenei. E te buka hopea, na te aposetolo Ioane ïa a 1 900 matahiti aˈenei. To vai manaˈo ta tera mau tane i papai? Ua faaohipa te Atua i to ˈna varua moˈa no te faaite ia ratou i ta ˈna poroi. (Samuela 2, 23:2) O te mau manaˈo o te Atua ta ratou i papai, eiaha to ratou iho. O Iehova ïa te Fatu o te Bibilia.—A taio i te Timoteo 2, 3:16; Petero 2, 1:20, 21.

A hiˈo i te video O vai te Fatu o te Bibilia?

2. Eaha te haapapuraa e na te Atua te Bibilia?

Na te Atua iho â te Bibilia no te mea te faaite atea ra te reira i te mau mea e tupu a muri aˈe ma te tano roa. (Iosua 23:14) O te Atua Mana hope anaˈe te tia ia tohu ma te tia roa i te oraraa o te huitaata a muri aˈe.—A taio i te Isaia 42:9; 46:10.

Mea otahi mau â te buka a te Atua. E piti miria tiahapa Bibilia na roto hau atu i te 450 reo tei operehia. Noa ˈtu e mea maoro te papairaahia, ua tuea maitai te Bibilia i ta tatou i ite no nia i te natura. Oia atoa te faatiaraa a na 40 tiahapa tane.a Hau atu â, te faaite roa ra te Bibilia i te here o te Atua e mea puai te reira no te haamaitai i te oraraa o te taata. No reira e rave rahi taata e tiaturi o te Bibilia te Parau a te Atua.—A taio i te Tesalonia 1, 2:13.

A hiˈo i te video E nafea e papu ai ia tatou e e parau mau te Bibilia?

3. Eaha to roto i te Bibilia?

Te faaite ra te Bibilia i te parau apî oaoa e e opuaraa î i te here ta te Atua no te huitaata. Te faataa atoa ra eaha tei tupu i ere ai te taata matamua i te oraraa paradaiso i te fenua e e nafea te reira e haamau-â-hia ˈi.—A taio i te Apokalupo 21:4, 5.

E ture, e aratairaa e e aˈoraa atoa to roto i te Bibilia. Hau atu â, te faatia ra te Bibilia i ta te Atua haaraa e te huitaata, o te faaite ra ïa i to ˈna huru. I roto i te Bibilia e ite ai oe o vai o ˈna e e nafea ia riro ei hoa no ˈna.—A taio i te Salamo 19:7, 11; Iakobo 2:23; 4:8.

4. E nafea ia taa i te Bibilia?

E tauturu teie buka rairai ia oe ia taa i te Bibilia maoti te ravea ta Iesu i faaohipa na. Ia faahiti oia i te tahi mau irava, e faataa oia i “te auraa o te mau Papai.”—A taio i te Luka 24:27, 45.

Aita ˈtu e parau maitai aˈe maori râ te parau apî oaoa no ǒ mai i te Atua. Aita râ vetahi e tâuˈa ra i te reira e mea riri atoa na te tahi atu. O oe râ, a tamau i ta oe haapiiraa. Tei te iteraa i te Atua e nehenehe ai oe e tiaturi e ora e a muri noa ˈtu.—A taio i te Ioane 17:3.