2 Ohipa amui

EAHA TE AURAA?

Ia ohipa amui na hoa faaipoipo, e au te tane e te vahine i te pairati e to ˈna mono i nia i te hoê â tere manureva. Ia farerei raua i te fifi, eita hoê e manaˈo “ia ˈna iho,” ia “raua” râ.

ARATAIRAA BIBILIA: “E ere atura ïa raua e piti, hoê râ.”—Mataio 19:6.

“Ia faaipoipohia oe, e ere faahou o oe anaˈe. E tia ia ohipa amui te tane e te vahine ia manuïa to raua faaipoiporaa.”—Christopher.

NO TE AHA MEA FAUFAA?

Ia tupu te fifi, ia ore na hoa faaipoipo e ohipa amui, eita raua e aro i te fifi, e aro râ raua te tahi i te tahi. E faarahi ïa raua i te mau peapea faufaa ore.

“Mea faufaa roa ia ohipa amui na hoa i roto i te faaipoiporaa. Ahani eita mâua ta ˈu tane e ohipa amui, e ere faahou ïa mâua i te hoa faaipoipo, e hoa piha noa râ, e piti taata hoê â faaearaa to raua, aita râ e tu ra te manaˈo ia ravehia te mau faaotiraa faufaa.”—Alexandra.

EAHA TE NEHENEHE E RAVE?

A TAMATA

• Te parau ra anei oe no ta oe moni “na ˈu noa”?

• No te tamaru ia oe, e hinaaro anei oe e faaatea ê i to oe hoa faaipoipo?

• E ape anei au i te fetii o to ˈu hoa faaipoipo noa ˈtu mea piri oia ia ratou?

A APARAU I TO OUTOU HOA FAAIPOIPO

• I teihea tuhaa o te faaipoiporaa mea ohipa amui mâua?

• Eaha te mau tuhaa te tia ia mâua ia haamaitai?

• Eaha te rave ia ohipa amui noa mâua?

MANAˈO TAUTURU

• A feruri na te aro ra orua i nia i te tahua tairiraa popo. E nafea râ oe e apiti ai i to oe hoa faaipoipo i roto i te hoê â pǔpǔ?

• Eiaha e feruri ‘E nafea vau e upootia ˈi?,’ tera râ ‘E nafea mâua e piti e upootia ˈi?’

“Eiaha e imi o vai tei tano e o vai tei hape. Te mea faufaa aˈe, ia vai te hau e te tahoêraa i roto i to orua faaipoiporaa.”—Ethan.

ARATAIRAA BIBILIA: “A imi atoa . . . i to vetahi ê maitai, eiaha noa râ i to outou iho.”—Philipi 2:3, 4.