E manu nehenehe mau

E ITEHIA te mau û purapura maitai ia rere te nǎnǎ manu parauhia Ara na nia i te ururaau! Ua faahiahia roa te feia hiˈopoa no Europa i te iteraa i te reira a tae ai ratou i Marite i Ropu e i Apatoa i te mau matahiti 1400. A hiˈo na i te hohoˈa i nia ˈtu, tera te huru manu ta ratou i ite. Mea roroa to ratou hope e e itehia ratou na te mau vahi veavea e haumi o Marite. I nia i te mau hohoˈa fenua, mea maoro to ratou riroraa ei tapao faaite o te mau vahi faarirohia ei paradaiso.

Mea pura aˈe to ratou û i to te tahi atu mau manu. E manu maramarama ratou e te ohie ia haafatata ˈtu. Mea ahoahoa roa e puai mau to ratou taˈi. I te poipoi roa, mai to ratou ofaaraa, e rere amui hau atu 30 manu no te haere e imi i te maa mai te mau huero, te maa hotu e te vai ra ˈtu â. E pinepine ratou i te faaohipa i to ratou avae no te haru i te maa e no te tuu i roto i to ratou utu rahi e te puu. Maoti te reira, e nehenehe roa ta ratou e vahi i te huero paari mau! Ia paia ratou, e haere te nǎnǎ i nia i te mato, e aore ra i te hiti anavai no te amuamu i te araea. E tauturu hoi te reira ia tamâ i te mea taero no roto mai i te maa ta ratou i amu e ia fanaˈo i te mau mea maitatai no to ratou tino.

Eita te apiti o te manu e faarue ia ˈna tae roa ˈtu i to ˈna pohe e mea haapao te tahi e te tahi i ta raua fanauˈa. E ofaa teie mau manu huru rau i roto i te mau apoo o te mau tumu raau, hiti anavai e nia i te ofaaraa o te mau manumanu amu raau. Na reira atoa i roto i te mau ana e te mau afaraa o te mau mato. I reira e itehia ˈi na apiti manu ia tamâ i te pererau o te tahi e te tahi. I te 6raa o to ˈna avaˈe, ua paari te fanauˈa e e faaea oia i to ˈna na metua e toru matahiti i te maoro. I roto i te ururaau, e nehenehe tera huru manu e ora 30 aore ra 40 matahiti. Ia tapeahia o ˈna i roto i te fare manu, e naea ia ˈna hau atu 60 matahiti. E 18 hohoˈa manu mai teie, a hiˈo na te tahi o ratou i raro noa ˈtu e i te pae atau.