Mea faufaa anei te tiaturiraa?
AHURU noa matahiti to Daniel, ua aro râ oia i te mariri ai taata no te hoê maororaa hoê matahiti. Noa ˈtu ua manaˈo te mau taote aita e ravea faahou, ua tamau Daniel i te tiaturi ia tae i te hoê mahana e riro mai oia ei aivanaa no te imi i te ravea rapaauraa no te mariri ai taata. Ua tiai ru Daniel i te farerei i te hoê taote mariri ai taata, no te huru râ o te reva, aita tera taote i tae mai! Mea na reira te feruriraa o Daniel i te haaparuparuraa e tau mahana i muri aˈe, pohe atura.
Na te hoê taote i rave i te maimiraa no te ite e nehenehe anei te tiaturiraa e ohipa i nia i te ea o te taata i faatia i te aamu o Daniel. Ua faaroo aˈena paha outou i te aamu mai tera te huru. Ei hiˈoraa, e nehenehe te hoê taata ruhiruhia e faaoromai i mua i te pohe no te farerei noa i te hoê taata herehia aore ra no te tiai i te hoê mahana taa ê. E i muri mai i te reira, e faarue mai ratou. E parau mau iho â anei e nehenehe te tiaturiraa e horoa mai i te puai?
Te rahi noa ˈtura te taote o te parau ra e nehenehe te feruriraa maitai e te hoê tiaturiraa e ohipa mai i nia i te ea e te oraraa o te hoê taata. E ere pauroa râ te manaˈo ra mai tera. Aita vetahi e farii ra i tera mau parau no te mea aita e haapapuraa no ǒ mai i te aivanaa. No ratou, ua maˈi-anaˈe-hia te hoê taata, to ˈna ïa tino tei fifi, e ere to ˈna feruriraa.
E ere râ tera mau faahaparaa no teie nei! E rave rahi matahiti na mua ˈˈe, ua parau te philosopho Heleni o Aristote “aita e niu to te tiaturiraa, e moemoeâ noa te reira.” Area te taata poritita Marite o Benjamin Franklin, ua na ô ïa: “Te taata o te tiaturi noa, eita te mea ta ˈna e tiai ra e tupu.”
Eaha mau na râ te tiaturiraa? E manaˈo noa anei o te nehenehe e tamahanahana ia tatou i roto i te fifi? Aore ra e parau papu te reira o te nehenehe e haamaitai i to tatou ea e o te faaoaoa ia tatou.