Eaha te ohipa aravihi?

NA TE TAATA PAPAI A A ARA MAI NA! I PANIORA

EAHA te ohipa nehenehe roa ˈˈe ta oe i ore i ite aˈenei? O te hoê taperaa mahana mahanahana anei, te hoê mouˈa tei î i te hiona, te mau faaapu tiare i roto i te medebara, te mau peni unauna o te hoê uru raau i te tau auhune anei?

Mea au roa na te rahiraa o tatou i te tahi mau taime taa ê ia hutihia to tatou mata e te nehenehe o te fenua. Ia nehenehe tatou, mea au na tatou e haere e faafaaea i te mau vahi mai te paradaiso ra te huru, e e tamata iho â tatou i te pata i te mau hohoˈa nehenehe roa ˈˈe.

Ia hiˈo faahou oe i te tahi atu taime i teie nehenehe rahi o tei ore i viivii, e uiui iho â oe i te tahi mau uiraa. Eita anei oe e manaˈo e te erehia ra i te tahi ohipa ia “ore e itehia” e na vai i peni i te mau hohoˈa atoa i roto i te hoê piha peni aravihi? Mai te peu e ua putapû roa oe i te huru maitai e te nehenehe o te mau hohoˈa penihia i roto i te hoê fare faaiteiteraa, eita anei oe e hinaaro e ite e na vai i peni? E tia anei ia tatou ia haafaahiahia i te mau ohipa nehenehe o te fenua e ia huna i te Taata aravihi i poiete i te reira?

Parau mau, te faahua parau nei vetahi e aita e ohipa aravihi i roto i te natura—te titau ra taua ohipa aravihi ra i te maramarama o te hoê taata ia hamani e ia tatara. E mea poto râ paha teie tatararaa i te auraa o te ohipa aravihi. Eaha mau na te ohipa aravihi?

Te tatararaa i te auraa o te ohipa aravihi

Eita paha te taatoaraa e mauruuru i te hoê tatararaa o te auraa o te ohipa aravihi. Te vai ra te hoê faataaraa maitai rii i roto i te Webster’s Ninth New Collegiate Dictionary, o te tatara ra i te auraa o te ohipa aravihi mai “te faaohipa-maitai-raa i te maramarama e i te feruriraa e hamani i roto iho â râ i te hamaniraa i te mau ohipa nehenehe.” E nehenehe ïa tatou e parau ia au i teie faataaraa e te titau ra te hoê taata hamani ohipa aravihi i te maramarama e te feruriraa e hamani. Ia faaohipa anaˈe oia i teie nau ite e piti, e nehenehe ïa o ˈna e hamani i te hoê ohipa e auhia aore ra e anaanataehia e vetahi ê.

Ua taotiahia anei te mau parau ra maramarama e feruriraa i te mau ohipa aravihi a te taata? Aore ra te ite-atoa-hia ra te reira i roto i te ao natura e haaati ra ia tatou nei?

Te mau séquoia teitei no Kalifonia, te mau aˈau aano no Patitifa, te mau toparaa pape rarahi o te uru raau i te pae rua ma, e te aere nǎnǎ no Afirika, i roto e rave rau huru, e mea faufaa roa ˈˈe te reira no te huitaata nei i te “Mona Lisa.” No taua tumu ra, ua faariro te UNESCO (Faanahonahoraa a te mau Nunaa Amui i te pae haapiiraa, te ite aivanaa, e te ihotumu) i te Aua Séquoia o te mau Hau Amui no Marite; te mau Toparaa pape i Iguaçú, i Raparata/Beresilia; te Aˈau Rahi, i Auteralia; e te Aua Serengeti o te fenua Tanzanie, mai te hoê tuhaa o te “Faufaa Rahi” a te huitaata nei.

Te vai atoa ra i roto i teie mau taoˈa faufaa natura te mau fare i patuhia e te taata. No te aha? Te opuaraa o te parururaa ïa i te mau huru mea atoa “e faufaaraa taa ê rahi roa” to ratou. Te parau nei te UNESCO e mai te peu e ua faanehenehehia te menema o te Taj Mahal, i Inidia, aore ra te Grand Canyon, i Marite, e tia iho â ïa ia paruru i te reira no te mau ui no a muri aˈe.

Aita râ e faufaa e haere roa ˈtu i te hoê aua faaiteiteraa no te mataitai i te maramarama e hamani. Te hoê hiˈoraa rahi o to tatou iho tino ïa. Ua faariro te feia tarai no Heleni tahito ra i te tarairaa o te taata mai te faito teitei roa ˈˈe o te huru maitai o te ohipa aravihi, e ua tamata ratou i te faahohoˈa i te reira ma te tia roa. Maoti to tatou ite i teie nei no nia i te mau ohipa i roto i te tino, e hau atu tatou i te taa i te aravihi taatoa tei titauhia no to ˈna hamaniraa e te opuaraa.

Eaha ïa no nia i te feruriraa e hamani? A hiˈo na i te hohoˈa haviti o te aero o te teki e matara noa ra, te uaaraa fifi o te hoê roti, aore ra te marereraa vitiviti roa o te hoê manu anapanapa tei piihia te colibri. E mea papu, e ohipa aravihi iho â teie, na mua ˈˈe atoa a penihia ˈi aore ra a patahia ˈi te hohoˈa. Ua ani te hoê taata papai o te National Geographic, o tei putapû i te mau aa vareau o te hoê huru lili ereere, i te hoê taurearea aivanaa e eaha te tapao o te reira. Teie ta ˈna pahonoraa ohie: “Te faaite ra ratou i te huru feruriraa o te Atua.”

Aita te maramarama e te feruriraa e hamani i rahi noa i roto i te ao natura tera râ, ua riro atoa te reira ei tumu tei faaohipa-tamau-hia e te feia hamani ohipa aravihi. Teie ta Auguste Rodin, te taata tarai tuiroo no Farani, i parau: “Te taata hamani ohipa aravihi o te taata ïa e tiaturihia e te natura. E taairaa to rotopu i te mau tiare e o ˈna na roto i te huru fefe au noa o to ratou tie e te mau huru taa ê penihia ma te au maite o to ratou uaa.”

Ua farii roa te tahi feia hamani ohipa aravihi i to ratou otia ia tamata ratou i te faahohoˈa faahou i te nehenehe natura. “Ua riro noa te ohipa aravihi mau mai te hoê faahohoˈaraa tia ore o te tia-roa-raa o te Atua,” o ta Michel-Ange ïa i faˈi, te hoê taata hamani ohipa aravihi roa ˈˈe o te mau tau.

Ua putapû roa paha te mau aivanaa, e te feia hamani ohipa aravihi atoa, i te nehenehe o te ao natura. Te faataa ra te hoê orometua haapii i te tuatapaparaa i te mau puai o te taoˈa e te numera, o Paul Davies, i roto i ta ˈna buka ra The Mind of God, e “ite pinepine atoa te feia etaeta aita e tiaturi ra i te Atua i te mea e piihia ra te manaˈo faatura no te natura, te hoê manaˈo putapû e te auraro no to ˈna huru paari hohonu e to ˈna nehenehe e to ˈna aravihi, e te tuea ra te reira i te mǎtaˈu faaroo.” Eaha ïa ta te reira e haapii maira ia tatou?

Te Taata hamani ohipa aravihi i muri mai i te ohipa aravihi

Te haapii ra te hoê taata i te ohipa aravihi no nia i te taata hamani maramarama no te taa e no te haafaufaa i ta ˈna ohipa aravihi. E taa ia ˈna e te ohipa a te taata hamani ohipa aravihi o te feruriraa ïa o te taata. Te faaite atoa ra te ohipa aravihi natura i te huru o te tumu o te natura, te Atua Mana hope. “Te itea papuhia nei [to ˈna mau huru maitatai ite-ore-hia] i te mau mea i hamanihia nei,” o ta te aposetolo Paulo ïa i faataa. (Roma 1:20) Hau atu, ua itehia e o vai te Poiete o te fenua. Mai ta Paulo i parau i te mau philosopho no Ateno o to ˈna ra tau, “aita râ [te Atua] i atea ê atu ia tatou atoa nei.”—Ohipa 17:27.

Aita te mau ohipa aravihi tei poietehia e te Atua i hamanihia ma te tumu ore aore ra i tupu taue mai. Hau atu i te haafaufaaraa i to tatou oraraa, te faaite ra te reira i te mau maramarama, te huru feruriraa, e te teitei o te Taata ohipa aravihi rahi roa ˈˈe, te Poiete Rahi roa, te Atua ra o Iehova. E tuatapapahia i roto i te tumu parau i mua nei e nafea teie ohipa aravihi e nehenehe ai e tauturu ia tatou ia haapii maitai atu â no nia i te Taata ohipa aravihi Teitei.

[Faaiteraa i te fatu o te hohoˈa i te api 3]

Musei Capitolini, Roma