Te roimata o te natura
TE AAHIATA noa ra, e mea haumǎrû te mataˈi e aita e maniania. Te anaana ra te mau rauere e te mau aihere rii i te hupe, o te anaana i te maramarama matamua o te mahana. I roto i te hoê auraa parau, e au ra mai te roimata o te aihere no te oaoa i te farii-popou-raa i te hitiraa mahana. E ere i te mea maere e ua faatupu teie hupe i te manaˈo o te mau rohipehe—e o te feia pata hohoˈa.
Tera râ, ua hau atu â te hupe i te tamǎrû noa i te feruriraa o te taata. Teie tupuraa o te reva, matauhia na nia i te palaneta taatoa taa ê noa ˈtu i te mau fenua o te poro, o te hoê ïa topata o te haumi faufaa o te ora. Ua poiete te Atua ra o Iehova i te reva e ia toetoe anaˈe i te po no te tahi mau huru tupuraa, e itehia te mea tei matauhia te riroraa mai te mǎhu ei hupe. Teie te anuvera eita te mataˈi e vai noa ei hupe e e mairi hoi i raro e mea toetoe aˈe i te mataˈi. Na roto i to ratou mau rauere, ua matauhia e e rave rahi aˈe mai te mau raau tupu e poihâ ra i te mau topata o te hupe, hoê â to ratou teiaha, o ta ratou e faarue rahi na roto i to ratou mau aa no te haapue i roto i te repo.
I roto i te mau fenua e faahitihia ra e te Bibilia, ia vai maoro mai te tau paˈura, e nehenehe te hupe i te tahi mau taime e riro mai ei pape otahi no te mau raau tupu. No reira, e pinepine te Bibilia i te faatuati te hupe e te haapueraa maa—e te ereraa o te hupe, e te oˈe.
Te vai atoa ra to te hupe iho auraa. I roto i ta ˈna himene aroharaa hopea i te nunaa a te Atua, ua papai o Mose e: “Mai te ûa e mairi ra ta ˈu parau ia mairi, e tau reo mai te hau e tohua ra; mai te tuâ ûa i nia i te raau rii tupu ra, e mai te ûa rahi i nia i te matie ra.” (Deuteronomi 32:2) Ua faahiti o Mose i te mau parau o te faaitoito mai te hupe ra. I te mea hoi e e taata haehaa roa ˈˈe o ˈna i te mau taata atoa, e mea papu e e taata maitai o ˈna e te faatura atoa i roto i ta ˈna aparauraa. (Numera 12:3) Mai te hupe aore ra te ûa mǎrû ra, ua tauturu ta ˈna mau parau i faahitihia ma te ore e faaino.
I te taime i mua nei e maere ai outou i te nehenehe haumǎrû o te hupe o te poipoi—te roimata iho o te natura—e hinaaro paha outou e feruri hohonu i nia i te paari faahiahia mau o te Poiete o te hupe.