Te tau a muri aˈe—Te tau maitai roa ˈˈe!
IA AU i te Bibilia, ua opua te Atua e e ora noa te taata e a muri noa ˈtu i nia i te hoê fenua faarirohia ei paradaiso. (Genese 1:28; 2:8, 9) Parau mau, ua atea roa tatou i te opuaraa matamua a te Atua. Eaha tei tupu?
Ua faaroo ore na taata faaipoipo matamua i te Atua, e ua faatupu te reira i te huru taata tia ore e te pohe no raua iho e no te taatoaraa o ta raua huaai. (Genese 2:16, 17; 3:6, 7, 17-19; Roma 6:23) Te faataa nei te Bibilia e: “No te taata hoê ra i ô mai ai te ino i te ao nei, e no te ino hoi te pohe; e ua taea-atoa-hia te taata atoa e te pohe i te mea ua hara paatoa.”—Roma 5:12.
Noa ˈtu teie huru tupuraa, aita te opuaraa a te Atua i taui. “Mai te ûa mau e topa nei, e mai te hiona, no nia mai i te raˈi ra, e aore i hoˈi faahou i reira; ua faararirari râ i te fenua ra, e ua faatupu ra, e ua faahotu mai hoi i ta ˈna, i noaa ˈi hoi te huero i te feia e ueue, e te maa i te feia i amu ra: oia atoa te parau no roto i to ˈu nei vaha . . . e noaa hoi te mea i faaue atu ai au ra.” (Isaia 55:10, 11) Eaha ta te Atua e tǎpǔ ra no tatou?
TE MAU HAAMAITAIRAA I RARO AˈE I TE BASILEIA O TE ATUA
Te ora mure ore
“E parahi te feia parau- tia i nia i te fenua, e parahi tamau â ratou i reira.”—Salamo 37:29.
“E ore roa te pohe, e te oto, e te mihi, e te mauiui, e ore atoa ïa.”—Apokalupo 21:4.
Te ino ore
“No parahirahi aˈe te paieti ore, e aita ra; oia â ïa, e hiˈo â oe i to ˈna vahi, e aita nei.”—Salamo 37:10.
Te hoê ohipa oaoa
“E patu ratou i te fare, e na ratou iho e parahi; e na ratou e tanu i te ô vine, a amu ai i te maa i reira. E ore ratou e patu, e na vetahi ê e parahi; e ore ratou e tanu, e na vetahi ê e amu; mai te mau mahana o te raau nei te mau mahana o to ˈu ra mau taata, e vai taiata te aho o to ˈu ra feia i maitihia i to te mau mea ta ratou i hamani.”—Isaia 65:21, 22.
Te oraora-maitai-raa
“E ore hoi to reira e parau e, Ua paruparu vau i te maˈi; te mau taata e parahi i reira, ua faaorehia te utua o ta ratou hara.”—Isaia 33:24.
Aita e hapepa
“E faaaraarahia ˈi te mata o te matapo ra, e amaha hoi te tariˈa o te feia tariˈa turi ra: ei reira te pirioi e ouˈauˈa noa ˈi mai te aili, e himene mai hoi te vaha o te taata vava ra.”—Isaia 35:5, 6.
Te maa pue
“E riro hoi e maa sitona tei te fenua i nia i te tupuai o te mau mouˈa ra.”—Salamo 72:16.
Te hau
“A haere mai na, a hiˈo i ta Iehova i rave! te pau ta ˈna i rave i te fenua nei! Ua faaore oia i te tamaˈi e tae roa aˈenei i te hopea fenua!”—Salamo 46:8, 9.
TA OE E TIA IA RAVE
Eaha te tia ia oe ia rave no te fanaˈo i teie mau haamaitairaa tǎpǔhia e te Atua? Te pahono ra te Bibilia i roto i te Ioane 17:3 e: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” Oia, na roto i te haapiiraa no nia i te Atua—to ˈna iˈoa, ta ˈna opuaraa, e ta ˈna mau ture—e noaa ia tatou te hoê aratairaa. Hau atu â, na roto i te haapiiraa no nia ia Iesu—to ˈna oraraa i nia i te fenua nei, to ˈna tusia hoo no ta tatou mau hara, to ˈna tiaraa ei Faatere o te Basileia o te Atua—e nehenehe tatou e tiaturi e e tupu iho â te opuaraa a te Atua.
Ua riro te faatia-noa-raa te Atua i te ino ei haapapuraa e eita iho â te taata, mai te hoê ratere i nia i te hoê tuhaa fenua matau-ore-hia, e nehenehe e aratai i to ˈna iho ra mau taahiraa avae. (Ieremia 10:23) Oia mau, na roto i te mau huru faatereraa atoa—mai te mau faatereraa haavî e tae atu i te mau faatereraa manahune—ua tamata te taata i te mau eˈa atoa. Aita roa ˈtu râ oia i manuïa.
Auê tatou i te mauruuru e e pahono mai te Basileia o te Atua i te pure a te mau mirioni taata e: “Ia haapaohia to oe hinaaro i te fenua nei, mai tei te ao atoa na.” (Mataio 6:10) E fanaˈohia te mau haamaitairaa a te Basileia o te Atua i nia i te fenua nei ia mono anaˈe oia i te taatoaraa o te mau faatereraa taata o te fatata maira. Te tǎpǔ ra te Bibilia e: “Ia tae i te anotau o taua mau arii ra, e faatupu ai te Atua o te raˈi ra o te hoê basileia, o te ore roa ïa e mou, e ore roa hoi e riro ia vetahi ê; e hope roa hoi taua mau basileia ra i te parari e e pau, e vai tera e a muri noa ˈtu.”—Daniela 2:44.
Auê ïa taime rahi e! Na te ite no nia i te Bibilia e turai ia tatou na roto i te tiaturiraa. Oia, e mau tau arepurepu mau teie—e e ino roa ˈtu râ. Te haapapu noâ nei râ te reira e te ora ra tatou i te mau mahana hopea o teie faanahoraa o te mau mea iino. Fatata teie tau ino mau i te monohia e te tau maitai roa ˈˈe i raro aˈe i te Basileia o te Atua!