Te taata o te paruru i ta tatou mau animala rata ore
MAI te haamataraa o te aamu o te taata, ua ite te taata i te oaoa i roto i te haapiiraa o te mau animala taehae. Ma te peapea, noa ˈtu to te Atua fariiraa i te taata ia amu i te iˈo ei maa na ˈna, ua ino roa te haafaufaaraa i te mau animala rata ore na roto i te haapoheraa faufaa ore e te taparahiraa riaria.—Genese 2:19, 20; 9:2; 10:9; 25:27.
Tera râ, ua tamau te tahi mau taata i te maere i te mau animala rata ore o te fenua. E fatata tau 3000 matahiti i teie nei, ua papaihia te mau parau a te Salamo 104 e te hoê taata here i te animala rata ore. Te faahiti ra oia i te mau huru rau poieteraa atoa ma to ratou iˈoa, mai te mau asini oviri, te mau liona, te mau puaaniho o te mouˈa, te mau saphana o te mato, e te mau berusi. I roto i ta ˈna haapiiraa i te mau manu, te mau manu himene, e te mau animala taehae, ua turaihia te papai salamo ia pii i roto i te pure: “E mau ravea paari anaˈe â ta [Iehova]!”—Salamo 104:10-12, 17-21, 24.
Oia mau, e nehenehe mau o te Atua ra o Iehova e haamaitaihia ma te tia e ta ˈna mau ohipa faahiahia o te poieteraa. (Genese 1:31) No reira, e nehenehe tatou e tiaturi e eita o ˈna e vaiiho noa ia haamouhia te mau animala rata ore i nia i te fenua. Ia au i te reira, ua faaurua te Atua i te papai salamo ia papai i te mau parau o te tia ia riro mai ei parau apî no te taatoaraa o te feia e here ra i te animala rata ore. Te parauhia maira ia tatou e ua haamauhia “te tumu o te fenua, ia ore roa ia aueue.” (Salamo 104:5) E mea papu te titau atoa ra teie huru tapitapi i te oraora-maitai-raa mure ore o teie palaneta i te mau poieteraa e ora ra i nia iho. (Isaia 45:18) Ua haapapu o Iesu Mesia i te tapitapi o te Atua no te mau poieteraa taehae i to ˈna parauraa e: “E ere anei taipae manu rii i hoohia i na asario e piti nei? e aita te hoê i taua na manu ra i moe i te Atua.” (Luka 12:6) Ua haamaramarama-atoa-hia te tapitapi o te Atua no ta ˈna mau poieteraa i roto i te Salamo 104, irava 14, o te nehenehe e taiohia: “Te faatupu nei oia i te aihere na te mau puaa, e te raua rii na te taata. E te roaa nei te maa ia ˈna no roto i te fenua.”
Ia au i teie mau ohipa, eita te Atua ra o Iehova e farii i te mau taata aita e haapao nei ia ˈna e o te haamǎtaˈu nei i te fenua e ta ˈna mau animala rata ore e a muri noa ˈtu. Ma te haapapu i te reira, te faaoti ra te Salamo 104 na roto i teie mau parau mahanahana: “Te feia rave hara ra, e mou ïa i te fenua nei; e te feia parau ino ra, e ore roa ïa.”—Salamo 104:35.
Auê ïa oaoa ia ite e te faaite ra te Atua i ta ˈna faaotiraa “ia haamou te feia e faaino ra te fenua.” (Apokalupo 11:18) I taua taime ra, e tupu ai te tahi mau parau tohu o te tupu nei i teie nei mahana na roto i te hoê huru taipe, i reira ratou e tupu ai i roto i te hoê huru mau. Ei hiˈoraa, Na roto i te arai o te peropheta ra o Hosea, te parau ra te Atua ra o Iehova e: “E ia tae i taua mahana ra e fafau ai au i te tahi faufaa no ratou i te mau manu o te fenua nei, e te mau manu o te raˈi ra, e te mau mea rii e nee i nia i te fenua nei; e te fana e te ˈoˈe, e te tamaˈi, e faaorehia e au i nia i te fenua nei; e faataoto atu vau ia ratou ma te ora.”—Hosea 2:18; Isaia 11:6-9.
A feruri na outou iho i roto i taua paradaiso ra i mua mai i nia i te fenua nei. Auê ïa tau oaoa e! ‘Tera râ’, e aniani paha outou ia outou iho e, ‘eaha te titauhia no te fanaˈo i taua mau huru haamaitairaa ra?’ Na mua roa, e mea faufaa ia haapii i te Parau a te Atua. E, no te feia e auraro ra i te aratairaa a te Bibilia, e faatupu te Atua ra o Iehova i teie parau tǎpǔ nehenehe: “E parahi te feia parau-tia i nia i te fenua, e parahi tamau â ratou i reira.”—Salamo 37:29.