No te aha te rahiraa e riro ai ei Ite no Iehova?

I ROTO e rave rahi mau fenua, e ui-mau-hia teie uiraa. Ei hiˈoraa, i Bologne, i Italia, ua faatupu te mau mana faatere o te haapaoraa i te hoê apooraa, ma te faatiahia e te pâpa, no te imi i te hoê ravea no te tapea i te haereraa i mua o te mau Ite no Iehova. Ia au i te vea ra La Repubblica, ua pii te Ekalesia katolika i te hoê “pii faaararaa”, no te mea hoê ahuru tausani katolika teie e riro nei ei Ite no Iehova i te mau matahiti atoa.

Ua parau te jésuite ra o Giuseppe De Rosa e “o te mau Ite no Iehova te pupu atâata roa ˈˈe i te pae o te haapaoraa. Mea haapii-maitai-hia ratou; e Bibilia noa tei to ratou rima”.

I roto i te hoê numera taa ê no nia i te mau Ite no Iehova, ua haapapu te vea jésuite ra La Civiltà Cattolica no te 18 no febuare matahiti 1984 e:

“A tahi, te tumu o te faito rahi o ta ratou haapaoraa, te mau ravea haaparareraa ïa ta ratou e faaohipa ra [oia hoi te pororaa]. Inaha, te ravehia ra ta ratou ohipa ma te tamau, i tera fare e tera fare, e te feia tei papu roa to ratou manaˈo e tei haapii-maite-hia no te reira (...).

“A piti, te manuïa nei te mau Ite no te nehenehe o te poroi jéhoviste; e nehenehe te reira e haamaha i te mau hiaai, te mau titauraa e te mau hinaaro o te taata nei. E haamaha te reira i te hinaaro i te mau mea papu, o te au-rahi-hia ïa i te hoê tau e mea papu ore te mau mea atoa. (...) Na nia ˈˈe i te mau mea atoa, e faaite papu roa te reira no nia i te tau no a muri aˈe; e faatiamâhia ïa te feia atoa e farii atu i te reira, i te mataˈu e te haapeapearaa, e nehenehe atu ai ratou e faaruru i te tau no a muri aˈe ma te oaoa, ma te papu e e ora mai ratou ia haamouhia te ao iino nei i te mahana riaria mau o te haavaraa a te Atua e e ora oaoa noa ratou e a muri noa ˈtu i nia i te fenua nei. E tauturu atoa te poroi jéhoviste i te taata ia faaruru i to ˈna haapeapearaa i mua i te fifi o te ao nei; te faaite nei te reira e fatata roa te hopea o te huru tupuraa teimaha no teie nei tau e te haamauraa o te hoê tau apî, o te hoê ao apî i reira te feia iino atoa o te manuïa nei i teie nei, e faaorehia ˈi. (...)

“Te toru o te tumu o te manuïaraa o teie haapaoraa, te mea ïa e horoa oia i ta ˈna mau melo i te hoê huru taata taa ê maitai e te puai; e fariihia ratou ma te mahanahana e e ite ratou i te autaeaeraa e te autahoêraa.”

Te faataa ra te papai a te Vaticana i te mau hinaaro a te mau taata i teie nei. Inaha, ia au i te parau i faahitihia i nia ˈˈe a te vea jésuite ra La civiltà Cattolica, na te poroi a te mau Ite no Iehova e haamaha ra i taua mau hinaaro ra. O ta te papai buka katolika ra o Vittorio Messori atoa i haapapu i roto i ta ˈna buka Scommessa sulla morte (Te hoê parieraa i nia iho i te pohe):

“Ia manaˈohia e te hoê o taua mau pupu faaroo ra e au i te buka apokalupo — oia hoi te mau Ite no Iehova — te haapaoraa o te ite nei i te maraaraa oioi roa ˈˈe i te ao nei, e turai mai te reira ia tatou ia feruri maite. I roto e rave rahi mau fenua, tei roto oia i te mau haapaoraa tei haapao-rahi-hia ˈˈe (...) e oia paha tei te parahiraa matamua i te pae no te paieti, te itoito, te ohipa e te aravihi no te faariro i te taata ei pǐpǐ.

“Eita te mau Ite no Iehova o tei haapapu roa i to ratou parahiraa, e ite-noa-hia i roto i te mau fenua kerisetiano; e itehia ratou na te ao taatoa nei i reira ratou, na roto i te iˈoa o Iehova, e na roto i te hoê taime poto roa, e roaa ˈi te mau tapao hau i te maitai i te mau mitionare katolika, porotetani e orthodoxes o te rave nei i te ohipa a tau senekele i teie nei.

“E mea taa-ore-hia teie puai faatupuraa i te rahi faahiahia mau e te taata noa o te ore e hinaaro e farii e (...) e au maite ta ratou huru tatararaa i te Bibilia i te mau hinaaro mau a te taata nei, mau hinaaro aita te tahi mau haapaoraa e haamaha faahou nei.

“Eita e nehenehe e ape i teie tumu parau ma te faahua parau e te manuïa nei te mau Ite no te mea te faariaria nei ratou i te taata. E ere roa ˈtu ïa te reira: taa ê roa ˈtu i te mau Ekalesia tei ‘haapapuhia’, eita ratou e farii e te vai ra te poauahi, e poro ratou i te faaore-roa-raa i te feia iino e te feia aita e faaroo e oia atoa te moe-roa-raa o te taata pohe. Te hoê paha manaˈo au-ore-hia; teie râ e mea riaria ore aˈe i te haamataˈuraa a te mau mauiui mure ore.”

Oia mau, e Atua aroha te Atua o te mau Ite no Iehova, eita oia e haamataˈu i te taata.

No roto mai te faahitiraa i mua nei i te vea katolika ra Mondo erre no mati 1986: “E tia maite ia faˈi e o te mau Ite no Iehova te mau taata matamua o te ora ia au i te faaroo ta ratou e poro ra: eita ratou e iria, e pupuhi i te avaava, e haapue i te mau taoˈa, e amui atu i roto i te mau ohipa politita, (...) te aufau nei ratou i ta ratou mau tute, te ora nei ratou ma te haapao maitai e te parau-tia, e mea oaoa ratou e te hamani maitai. No te reira mau mea atoa ratou e auhia ˈi.”

Titorotororaa i te tahi mau taata e katolika ratou na mua ˈˈe

E hiˈopoa anaˈe i teie nei i te tahi mau parau a na taata e piti e katolika raua na mua ˈˈe, e faataa mai raua no te aha raua i taui ai i ta raua haapaoraa.

Teie ta Rosanna C., te hoê vahine apî faaipoipohia teie e ora nei i roto i te tuhaa fenua no Parme (i te pae apatoerau o Italia), e parau nei:

“Ua ora vau i te oraraa oaoa i to ˈu nainairaa. Ua here rahi mai to ˈu na metua ia ˈu e ua haapiihia vau i roto i te haapaoraa katolika. I roto i to ˈu taurearearaa, mai te tahi atu â mau taurearea e rave rahi, ua hinaaro roa vau ia rave i te ohipa no te Atua, ia tavini ia ˈna. Ua atuatu vau i teie hinaaro na roto i te taioraa i te hoê buka o te mau Evanelia ta ˈu i hoo mai i roto i te hoê fare hooraa buka. Aita vau i taio aˈenei i te reira na mua ˈˈe. Ua tauturu mai te reira ia ˈu ia here ia Iesu. Ua ite au e ua afai mai oia i te huitaata nei, te hoê poroi tiaturiraa, teie râ, aita vau i papu maitai i te auraa. Ua taa atoa ia ˈu e e tia i ta ˈna mau pǐpǐ ia faaite i te aroha hohonu mau no te Atua e no to ratou taata tupu.”

A ara mai na!: Ua oaoa anei oe i te huru o to oe haapaoraa i ta oe haapaoraa?

Rosanna: Aita. I te 17raa o to ˈu matahiti, ua haapii au i te katetika i te mau tamarii 10 e tae atu i te 12 matahiti. No te mea hoi e tei roto na vau i te hoê pupu ui apî no te Action catholique, ua apiti na vau i te mau haaputuputuraa no te feruri i te pae varua. E mea ohipa vau, i te pae o te haapaoraa. Teie râ, e piti atoa ra mea aita roa vau i au: Aita matou i hiˈopoa aˈenei i te Bibilia, te buka o ta ˈu i faatura rahi roa, e, i roto i te pupu o ta ˈu i amui atu na, eita e itehia te hoê aroha mau e te tahoê. Na nia ˈˈe, ua turori roa vau i te mea ua fariihia te hoê tane mahu e te hoê vahine mahu i roto ia matou e mea faatura-roa-hia raua. I te hoê avatea, aita vau i faaoromai faahou, ua taˈi atura vau.

A ara mai na!: Ua ohie anei ia oe ia riro mai ei Ite no Iehova?

Rosanna: Aita, e ere i te mea ohie. I te mau mahana matamua a farii ai to ˈu na metua i te mau Ite no Iehova, aita vau i hinaaro e apiti atu i roto i te tauaparauraa. Teie râ, na muri aˈe, ua horuhoruhia vau i ta ratou mau peu maitai, e ua faaoti atura vau e apiti atu i roto i te hoê tauaparauraa bibilia no te haamatau ia ratou. Ua riro te reira e mea faufaa roa no ˈu. Te mea tei haaputapû roa ia ˈu, te mea ïa ua pahono mai ratou ma te maramarama maitai i ta ˈu mau uiraa atoa, na roto i te Bibilia.

A ara mai na!: Ua ani anei oe i te manaˈo o te hoê perepitero i muri aˈe i taua tauaparauraa ra?

Rosanna: Oia, e rave rahi taime, i te hoê atoa paretenia. Aita ratou i tutava aˈe no te tauturu i te hoê ‘mamoe tei moe’. I muri aˈe i to ˈu haapii-hohonu-raa i te Bibilia, ua faaite vau e ua pûpû vau ia ˈu iho i te Atua na roto i te bapetizoraa i te pape i te matahiti 1977.

Te parau nei o Claudio C., 30 matahiti, te faaea nei i Isernia (i ropu o Italia) e:

“I te ahururaa o to ˈu matahiti, ua haere au ma te hinaaro mau i roto i te hoê seminario a te mau capucins. Ua hinaaro vau e tavini i te Atua ei mitionare. E apitihia te oraraa i te seminario ra i te fifi i au i te mau tupuraa taa ê; te mea râ i haapeapea roa ia ˈu, te mea ïa aita te mau faatere i farii ia horoa mai i te hoê Bibilia na ˈu, te buka ta ˈu i hinaaro uˈana mau i te taio. Ua turori roa ˈtu â vau i te parauraa mai te hoê perepitero ia matou e no roto mai te taata i te animala. Ua papu ia ˈu e eita vau e nehenehe e roaa i ta ˈu tapao oia hoi te taviniraa i te Atua i te seminario, ua haere ê atura ïa vau i te 15raa o to ˈu matahiti.”

A ara mai na!: Mea nafea to oe iteraa i te mau Ite no Iehova?

Claudio: Ua haere mai ratou i to ˈu fare. Te haamanaˈo nei au e ua ui au ia ratou i te mau uiraa papu maitai; ua pahono tia roa mai ratou ia ˈu e ma te papu maitai. Ua vaiiho mai ratou e piti buka na ˈu, L’homme est-il le produit de l’évolution ou de la création? e Te Bibilia mau anei te Parau a te Atua?. I to ˈu taioraa i te reira, ua papu ia ˈu e aita hoê aˈe niu to te haapiiraa o te évolution e oia atoa e mea faauruahia te mau Papai e te Atua. Ua apiti mai to ˈu taeae ia ˈu no te imi i te parau mau, e ua aniani mâua ia mâua iho e e mau tia mau anei te mau Ite no te kerisetianoraa mau. E tia na ia mâua ia hiˈopoa maite i ta ratou mau haapiiraa tumu.

A ara mai na!: Eaha ˈtura ïa ta orua i rave?

Claudio: Ua tauaparau mâua e na perepitero e toru e te tahi atoa mau tia no te tahi mau haapaoraa porotetani. I muri aˈe i to mâua faatupuraa i te hoê hiˈopoaraa hohonu mau, ua papu atura ia mâua e o te mau Ite no Iehova te tauturu mau nei i te mau taata ia maramarama no nia i te Bibilia. Ua bapetizohia mâua ei Ite no Iehova. Ua raea ˈtura ïa ia ˈu te tapao ta ˈu i faaoti i to ˈu apîraa ra, oia hoi te taviniraa i te Atua.

E o outou, e hinaaro anei outou e faaau i ta outou mau tiaturiraa i te pae haapaoraa i te haapiiraa a te Parau a te Atua, te Bibilia? E itoito anei to outou no te na reira ma te parau-tia?

[Parau iti faaôhia i te api 5]

“E Bibilia noa tei to ratou rima.” — Giuseppe De Rosa, jésuite.

[Parau iti faaôhia i te api 6]

“O te mau Ite no Iehova te mau taata matamua o te ora ia au i te faaroo ta ratou e poro ra.” — Mondo erre, vea katolika.

[Hohoˈa i te api 6]

“Ua pahono mai ratou ia ˈu ma te papu maitai e te Bibilia.”

[Hohoˈa i te api 7]

Ua raea ˈtura ïa ia ˈu te tapao ta ˈu i faaoti i to ˈu apîraa ra, oia te taviniraa i te Atua.”