Putuputuraa na roto i te reni aparauraa

E rave rahi faatereraa ati aˈe i te fenua nei tei titau eiaha te taata ia farerei tino roa e tei opani i te mau putuputuraa. Ua ineine te mau Ite no Iehova i te auraro i teie titauraa a putuputu noa ˈi ratou ma te paruru ia ratou. No reira, te faaohipa nei te mau amuiraa i te mau reni aparauraa, mai ia Zoom, no te faatupu i te putuputuraa.

Ia tupu maite noa ta tatou mau putuputuraa, ua farii te Tino Aratai ia faaohipahia te mau ô no te tarahu i te Zoom no te mau amuiraa. Ua riro te reira ei tauturu papu no te tahi mau amuiraa tei ore i nehenehe e tarahu mai i te reni aparauraa, 1 600 CFP - 2 500 CFP aore ra hau atu. I faaohipa na taua mau amuiraa ra i te mau reni tamoni ore aita i rahi te taata e nehenehe e apiti mai aore ra aita te reni i paruruhia. Maoti te tarahuraa i te Zoom i fanaˈo ai te mau amuiraa atoa i teie reni paruruhia e i apiti mai ai e rave rahi atu â taata i te mau putuputuraa. Tae mai i teie mahana, hau i te 65 000 amuiraa i roto hau atu i te 170 fenua te faaohipa nei i teie reni.

Na mua ˈˈe ra, e reni tamoni ore ta te amuiraa Kairagi, i Manado, Sulawesi apatoerau i Initonetia. I muri iho, ua tarahu te faanahonahoraa i te Zoom na ratou. Te faataa ra te taeae Hadi Santoso: “E nehenehe atoa te mau taeae e tuahine aita i matau i te faaohipa i te mau matini roro uira e fanaˈo i te mau putuputuraa, no te mea iho â râ eita te reni e mutumutu noa e rave rahi taime a tupu ai te putuputuraa.”

Te faatia ra Lester Jijón, e matahiapo i roto i te amuiraa Guacayanes Oeste i Guayaquil, Équateur: “No te mea e mea ravai ore te mau taeae e tuahine, eita e nehenehe no te tahi mau amuiraa ia tarahu i te Zoom ia apiti mai te amuiraa taatoa i te mau putuputuraa. I teie nei râ, maoti te faanahonahoraa, ua tarahu matou i te Zoom a nehenehe atu ai e rave rahi atu taata e apiti noa mai, aita ˈtura ïa matou e taiâ ra ia raea te otia.”

Te papai ra Johnson Mwanza, e matahiapo i roto i te amuiraa Ngwerere apatoerau i Lusaka, Zambie: “Pinepine te taeae e tuahine i te parauraa: ‘Maoti te faanahonahoraa i tarahu ai i te Zoom na matou, i vai piri noa ˈi matou i te mau taeae e tuahine e i ite ai i te here e te aupuru o Iehova.’”

E faaohipa te faanahonahoraa i te moni tei tuuhia i te hiti no te ati natura no te tarahu mai i te reira. No ǒ mai teie moni i te mau ô tei pûpûhia ati aˈe te fenua nei. Pinepine taua mau ô ra i te faataehia na roto i te reni donate.jw.org. Mauruuru no ta outou mau ô horoa noa, o te tauturu atoa i te tahi atu mau ati na te fenua atoa nei.—Korinetia 2, 8:14.