Te aravihi no te paturaa o te castor

Ua itehia mai e te mau aivanaa i te tahi mau paturaa a te animara parauhia castor o tei naea 850 metera i te roa, e hau i te 5 metera i te teitei. Mea nafea teie animara e nehenehe ai e hamani i teie huru paturaa era aˈe te rahi?

Na mua roa, e tâpû teie animara i te tumu raau e 30 tenetimetera te aano aore ra iti mai. E turai o ˈna i te mau amaa raau rarahi i roto i te tahora ta ˈna e faaohipa ei pou tia noa e i muri iho e apǎpǎ o ˈna i te mau amaa raau apî te tahi na roto i te tahi. E tuu atoa o ˈna i te mau ofai rarahi ia mau maitai a taamu ai te hiti o te paturaa i te hoê tumu raau aore ra ofai rarahi. E tuu faahou o ˈna i te mau pou raau na te vahi e tahe mai ai te pape ia paari maitai te paturaa. I te tahi atu pae o te paturaa, e tuu o ˈna i te mau amaa raau, te mau aihere e te vari ia ore te pape e tahe. Hau atu â, e hamani teie animara e piti apoo i te hiti ia tahe noa te pape i tera vahi. E ia ûa puai, e faaaano o ˈna i teie mau apoo.

Ua itehia mai e te mau aivanaa e haamaitai te huru paturaa a te castor i te mau vahi e haaati ra i ta ˈna paturaa. Ei hiˈoraa, e iti mai te heeraa fenua, e maitaihia te pape e e hopuna noa i roto i te repo fenua. Hau atu â, i te tau veavea e tahe noa te mau anavai. Maoti teie mau paturaa, e iti mai te pape pue no te mea e faahaerehia tera pape i te tahi atu vahi ia rarirari noa. Mea maitai teie mau vahi rarirari no te tapea i te auahi ia ore ia parare e e tupu noa te mau raau i reira. E rave rahi atoa animara e ora ra i tera vahi.

Ia au i te hoê maimiraa, ua faaite te mau aivanaa “e au te mau paturaa a te castor i te hamaniraa a te feia aravihi i te pae o te paturaa.” Oia mau, i Marite apatoerau, ua hamanihia e rave rahi paturaa mai ta teie animara. Mea tano iho â ïa ia parau, e animara aravihi mau te castor.

Eaha to oe manaˈo? Mea tupu noa anei te aravihi no te paturaa o te castor aore ra mea poietehia anei?