Apeehia e te mau mutoi

Mai te peu e Ite no Iehova oe, ua apeehia aˈenei oe e te mau mutoi no te poro i te parau apî oaoa i tera e tera fare? Tera mau tei tupu no Joseph i Mitoronetia i 2017. E maha ratou Ite no Iehova tei apiti i te hoê pororaa taa ê i te mau motu atea.

I te hora 12 i te avatea, ua tae ratou i te hoê motu nainai fatata 600 taata e ora ra i reira. I to ratou taeraa ˈtu i tatahi, na te tavana i farii mai. Te faataa ra Joseph i te ohipa i tupu i muri iho: “Ua parau mai te tavana e nehenehe te pereoo mutoi e afai ia matou i te mau fare atoa. Ua maere matou, tera râ ma te faatura, aita matou i farii. Ua hinaaro matou e farerei i te taata i tera e tera fare mai ta matou i matau.”

No to ratou hinaaro e paraparau i te mau taata atoa, haamata ˈtura Joseph ma i te poro na avae. Ua na ô ratou: “Aita matou i manaˈo e faaea maoro i tera e tera fare. Mea farii roa râ te taata e ua anaanatae atoa i te poroi!”

I tera iho â mahana, ua tere te pereoo mutoi e piti taime na pihai iho ia Joseph, e i te toruraa, tapea mai nei. Ua ani te mau mutoi ia Joseph mai te peu e nehenehe ta ratou e faahoro ia ˈna i te mau fare aita i porohia ˈtu ra. Pahono faahou atura Joseph, aita.Tera râ, te na ô ra oia: “I tera taime, ua onoono ratou ma te parau: ‘E taime poto te toe ra e mea maitai aˈe na matou e afai ia outou i te mau fare e toe ra.’ Farii atura vau no te mea mea rahi â te fare e toe ra. A piri ai matou i tera e tera fare, e horoa mai te mau mutoi i te iˈoa o te utuafare. Ua parau mai ratou eita anaˈe te taata e haere mai i rapae, e pu ïa ratou no te faaara i te fatu fare.”

Te na ô faahou ra Joseph: “Maoti tera tauturu, ua nehenehe matou e poro na te mau fare atoa i taua mahana ra. Mea rahi te mau papai ta matou i horoa e ua rave matou i te mau faanahoraa no te hoˈi e farerei i te taata tei anaanatae.”

Ua parau te mau mutoi ia Joseph: “Oaoa roa matou i te raveraa maa tuhaa iti no te haaparare i te parau apî oaoa.” I te faarueraa te mau Ite no Iehova i tera motu i te taperaa mahana, ua faaea noa te mau mutoi i tatahi no te nana ia ratou ma te mata oaoa e te mau papai i roto i to ratou rima!