No te aha te mau Ite no Iehova i taui ai i te tahi o ta ratou mau tiaturiraa?
Ua faaohipa noa matou i te Bibilia mai te niu otahi o ta matou mau tiaturiraa. Ua faatano ïa matou i ta matou mau tiaturiraa a taa maitai atu â ai i te mau Papai.a
Te tuati ra teie mau tauiraa i teie aratairaa Bibilia itehia i roto i te Maseli 4:18: “E au râ te eˈa o te feia parau-tia i te maramarama anaana o te poipoi o te anaana noa ˈtu â e avatea noa ˈtu.” Mai te hitiraa o te mahana o te faaite mǎrû mai i te mau mea e haaati ra ia tatou, e horoa mǎrû atoa mai te Atua i te maramarama i te pue parau mau no ǒ mai ia ˈna ra i te taime tano. (Petero 1, 1:10-12) Mai ta te Bibilia i tohu, ua haavitiviti atu â o ˈna i te reira i “te anotau o te hopea.”—Daniela 12:4.
Eita roa ˈtu matou e maere aore ra e huru ê ia faatanohia te tahi mau haamaramaramaraa. E tiaturiraa e e manaˈo hape to te mau tavini a te Atua i tahito e i titauhia na ia faatano i to ratou manaˈo.
Ua manaˈo Mose e ua tae te taime no ˈna no te faaora i te nunaa o Iseraela e 40 matahiti na mua ˈˈe te taime ta te Atua i faataa.—Ohipa 7:23-25, 30, 35.
Aita te mau aposetolo i taa i te parau tohu no nia i te poheraa e te tia-faahou-raa o te Mesia.—Isaia 53:8-12; Mataio 16:21-23.
E manaˈo hape to te tahi mau Kerisetiano matamua no nia i te taeraa mai o “te mahana o Iehova.”—Tesalonia 2, 2:1, 2.
I muri aˈe, ua faatano te Atua i ta ratou i maramarama na. E te pure nei matou ia tamau â o ˈna i te na reira i nia ia matou.—Iakobo 1:5.
a Eita matou e tamata i te huna i teie mau tauiraa no nia i te mau faataaraa Bibilia. Te pia nei râ matou i te reira. I roto i te buka Maimiraa Bibilia no te mau Ite no Iehova, a hiˈo i te anairaa tumu parau “Ite no Iehova.” I muri iho, a haere i te upoo parau “Manaˈo e tiaturiraa” e a taio i te “Faataaraa o ta tatou mau tiaturiraa.”