Tamahanahana ia vetahi ê noa ˈtu te fifi i te pae o te ea

E Ite no Iehova o Clodean e te ora ra o ˈna i Afirika apatoa. Ua fariihia o ˈna i te fare maˈi e ua tâpûhia o ˈna. E rave rahi fifi i te pae o te ea ta ˈna i ite e ua titauhia ia ˈna ia rave i te mau faaotiraa rahi no ta ˈna mau ravea rapaauraa. Hou te tâpûraa e i muri iho, ua rohirohi roa o ˈna, ua mauiui e ua ahoaho. Ahuru hebedoma i muri aˈe i to ˈna hoˈiraa i te fare, aita â o ˈna i nehenehe e parahi. E no te maˈi pee COVID-19, aita te taata i nehenehe e haere e farerei ia ˈna.

Ua faaoti papu o Clodean eiaha e haaparuparu ia ˈna. Ani atura o ˈna i te Atua ia horoa ia ˈna i te puai no te tamahanahana ia vetahi ê. I te taime iho â i nehenehe ai o ˈna e parahi, ua aparau o ˈna e te tuahine o to ˈna taata tapiri, tei haapii na i te Bibilia i te hoê taime, ua faaea râ o ˈna i teie nei. Ua horoa Clodean ia ˈna i te hoê manaˈo Bibilia faaitoito mau o tei turai ia ˈna ia haapii faahou i te Bibilia. Ua faataa atoa Clodean ia ˈna i te faufaaraa ia haere i te mau putuputuraa Kerisetiano. Ua haapao o ˈna e ua nehenehe te vahine e fanaˈo i te reira na roto i te ravea natirara. Ua apiti te vahine i te putuputuraa na roto i te natirara e ua horoa atoa o ˈna i te pahonoraa i te hoê tuhaa aparauraa o te porotarama.

I muri iho, ua paraparau Clodean i te tuahine apî aˈe o tera vahine, o tei hinaaro atoa e haapii i te Bibilia. Ua parau atoa o ˈna ia Clodean o vai te hinaaro atoa paha e haapii i te Bibilia. Eaha ïa te faahopearaa? Ua haamata Clodean i te haapii i te Bibilia i 4 atu â vahine. Aita râ o ˈna i faaea i reira!

Inaha mea haapeapea roa o Clodean i te maitai o vetahi ê, ua haamata o ˈna i te haapii i te Bibilia ia 10 atu â vahine i te roaraa o te maˈi pee, a faatere atu ai 16 haapiiraa Bibilia. Te haere tamau ra vetahi o ratou i te mau putuputuraa na roto i te ravea natirara. No te mea ua haa rahi Clodean no te tauturu ia vetahi ê ia haapii no nia ia Iehova, aita ïa o ˈna i tiatonu i nia i to ˈna mau fifi. No ˈna, o Iehova, “te Atua o te tamahanahana i roto i te mau tupuraa atoa,” tei tamahanahana ia ˈna i mua i to ˈna mau fifi, a nehenehe atu ai o ˈna e tamahanahana ia vetahi ê.—Korinetia 2, 1:3, 4.

Eaha te huru o te mau piahi a Clodean no nia i ta ratou i haapii? Te parau ra hoê o ratou: “Ua faufaa-rahi-hia vau i roto e rave rau tuhaa. Te mea faufaa roa ˈˈe râ, ua haapii au i te iˈoa o te Atua. Ua tauturu mai te reira ia faafatata ˈtu â ia Iehova.” Mai te vahine matamua ta Clodean i aparau atu, te tiai ru nei o ˈna i to ˈna mahana bapetizoraa. Ua oaoa roa o Clodean i te reira. E ua maitai mai to ˈna ea!