Te upeˈa i tahito ra

E ohipa ravaai te imiraa a te tahi mau pǐpǐ a Iesu. (Mar. 1:16-20) E faaohipa ratou i te upeˈa ia taiˈa ratou na te miti o Galilea.

E taamuamuhia te taura, te taura lino anei, no te hamani i te upeˈa. Te vai ra mea nainai te apoopoo, e te vai ra mea huru rarahi. Tei te huru ïa o te iˈa ta te taata e hinaaro e ravaai. No tera mau upeˈa nainai, pinepine ua taamuhia i nia iho te tapau aore ra te ofai. E pou ïa tera huru upeˈa i raro i te miti. E no tera mau upeˈa rarahi, e poito upeˈa tei te niaraa e e tapau tei te raroraa o te upeˈa.

Mea moni roa te upeˈa. E nehenehe te upeˈa e ino ia mau o ˈna i nia i te mau toˈa i raro, e mutu atoa no te rahi o te iˈa i roto i te upeˈa. (Luka 5:6) Te faahiti ra te Bibilia ia Iakobo raua Ioane “te tafai ra i te upeˈa.” Eita e ore ua faaohipa raua i te nira e te taura lino. (Mat. 4:21) E tafai paha vetahi i ta ratou upeˈa i te mau taime atoa e hoˈi mai ai ratou na te ravaairaa. Te faahiti atoa ra Luka i te mau ravaai “e tamâ ra i ta ratou mau upeˈa.” (Luka 5:2) Ia oti, e faatautau ratou i ta ratou upeˈa no te taraˈi ia ore ia pê.—Ezk. 47:10.

Ua titau manihini Iesu i teie mau tane tei matau i te faaohipa i te upeˈa ia riro mai ei “ravaai taata.”