Ia taa ia oe te mau faahohoˈaraa o te Bibilia

Ua hau atu hanere faahohoˈaraa i roto i te Bibilia. E ere râ mea ohie no e rave rahi taata ia taa i te reira. (Mat. 13:13) Eaha te tauturu ia oe ia taa i te auraa mau o te hoê faahohoˈaraa Bibilia? Teie mai e toru ravea:

• A hiˈopoa i te manaˈo faufaa e te faahohoˈaraa. Ei hiˈoraa, i roto i te Apokalupo 3:3, ua faaauhia te haereraa mai o Iesu (te manaˈo faufaa) mai te eiâ ra te huru (te faahohoˈaraa).

• A feruri eaha te tuatiraa i rotopu i te manaˈo faufaa e te faahohoˈaraa. A imi i te tumu e faaauhia ˈi te hoê ohipa aore ra manaˈo i te tahi atu, e a feruri eaha te tuatiraa e vai ra i rotopu i na manaˈo e piti faahitihia.

• Ia papu ia oe e ua taa maitai ia oe te auraa mau o te faahohoˈaraa. I te tahi taime, e hape te tatararaa a te hoê taata no nia i te hoê faahohoˈaraa Bibilia. Te auraa, aita o ˈna i taa maitai i te reira. A hiˈo na i te faahohoˈaraa no nia ia Iesu. E ere o ˈna mea haere mai e eiâ i te tahi ohipa. Eaha ïa te auraa o teie hiˈoraa? Eita te eiâ e faaara mai te haere mai ra o ˈna. Hoê â huru no Iesu, eita o ˈna e faaara mai te mahana e te hora e haere mai ai o ˈna.