Ua faaore Iehova i te hara hou a aufauhia ˈi te hoo

E faaorehia ta tatou mau hara maoti noa te hoo, oia hoi te tusia taraehara ta Iesu i pûpû. (Eph. 1:7) Tera râ, te parau ra te Bibilia: “Ua faaore te Atua i te hara i tupu i mutaa iho ra,” oia hoi hou Iesu a aufau ai i te hoo. (Roma 3:25) Mea nafea Iehova i te faaoreraa i te hara hou a aufauhia ˈi te hoo e i te hoê â taime e faaite ai e Atua parau-tia oia?

No Iehova, ua aufauhia te hoo i te taime i faaoti ai oia e horoa mai i te hoê “huaai” no te faaora i te feia atoa e tiaturi ra ia ˈna. (Gen. 3:15; 22:18) Ua papu roa ia Iehova e i te taime faataahia e aufau iho â ta ˈna Tamaiti otahi i te hoo. (Gal. 4:4; Heb. 10:7-10) A ora ˈi Iesu i te fenua, ua horoa Iehova ia ˈna i te mana no te faaore i te mau hara hou a aufauhia ˈi te hoo. Ua na reira Iesu no te mea ua ite o ˈna e tapoˈi te tusia ta ˈna e pûpû i te mau hara a te feia e tiaturi ra ia ˈna.​—Mat. 9:2-6.