Uiraa a te feia taio

I roto i te Salamo 61:8, ua parau Davida e e arue o ˈna i te iˈoa o te Atua “e a muri noa ˈtu,” te auraa anei e ua manaˈo o ˈna e eita roa ˈtu oia e pohe?

Aita! Mea papu maitai te mau parau a Davida.

E hiˈopoa anaˈe i ta ˈna i papai i roto i teie e te tahi atu mau irava: “E himene au i te arueraa i to iˈoa e a muri noa ˈtu a haapao ai au i ta ˈu i euhe i te mau mahana atoa.” “To ˈu Atua e Iehova, te arue nei au ia oe ma to ˈu aau atoa, e e faahanahana vau i to iˈoa e a muri noa ˈtu.” “E arue au i to iˈoa e a muri noa ˈtu.”​—Sal. 61:8; 86:12; 145:1, 2.

A papai ai Davida i teie mau parau, aita o ˈna i manaˈo e eita roa ˈtu oia e pohe. Ua ite o ˈna e ua parau Iehova e e pohe te taata no te mea ua hara ratou paatoa. Ua farii atoa Davida e taata hara o ˈna. (Gen. 3:3, 17-19; Sal. 51:4, 5) Ua ite o ˈna e ua pohe atoa te mau taata ta te Atua i farii maitai mai ia Aberahama, Isaaka e Iakoba. Ua taa ïa ia ˈna e e nehenehe o ˈna e pohe. (Sal. 37:25; 39:4) I roto râ i te Salamo 61:8, te faaite maitai ra o ˈna i to ˈna hinaaro e arue i te Atua e a muri noa ˈtu. Tera iho â ta ˈna i rave i te roaraa o to ˈna oraraa.​—Sam. 2, 7:12.

I te tahi mau taime, ua papai Davida no nia i to ˈna iho mau tupuraa, mai ta tatou e ite ra i roto i te upoo parau o te mau Salamo 18, 51 e 52. I te Salamo 23, te faaau ra Davida ia Iehova mai te hoê tiai mamoe o te aratai, o te tamǎrû e o te paruru ra i ta ˈna mau mamoe. Ei tiai mamoe, tera hoi ta Davida i rave i nia i ta ˈna iho nǎnǎ. Ua hinaaro atoa o ˈna e tavini i te Atua ‘i te mau mahana atoa o to ˈna oraraa.’​—Sal. 23:6.

Eiaha atoa e moˈehia ia tatou e no ǒ mai ia Iehova te mau mea atoa ta Davida i papai. E ite-atoa-hia i roto, te mau parau tohu no nia i te tupu i mua nei. Ei hiˈoraa, i roto i te Salamo 110, ua faahiti Davida i te taime e “parahi” ai to ˈna Fatu i te “rima atau” o te Atua. E horoahia ia ˈna te mana rahi no te haavî i te mau enemi o te Atua. I muri mai, “e haava e e faautua oia i te mau nunaa.” Hau atu, e tupuna Davida no te Mesia, oia hoi, te taata o te faatere i te fenua mai te raˈi mai e o te riro ei “tahuˈa . . . e a muri noa ˈtu.” (Sal. 110:1-6) Ua haapapu Iesu e no ˈna te mau parau e itehia ra i roto i te Salamo 110 e e tupu te reira a muri aˈe.​—Mat. 22:41-45.

Papu, ua aratai Iehova ia Davida ia papai no nia i tei tupu i to ˈna ra tau e te tupu a muri aˈe, oia hoi, te taime e faatiahia mai ai oia a nehenehe atu ai o ˈna e arue ia Iehova e a muri noa ˈtu. E tauturu te reira ia tatou ia taa e, te mau parau i roto i te Salamo 37:10, 11, 29, ua tupu te reira i Iseraela, e tupu atoa râ te reira a muri aˈe, i te taime e faatupu ai te Atua i te mau mea atoa ta ˈna i fafau.​—I roto i teie vea, a hiˈo i te paratarafa 8 o te tumu parau haapiiraa “Ei te paradaiso oe e o vau atoa.”

Te faaite ra te Salamo 61:8 e te tahi atu mau irava e ua hinaaro mau Davida e faahanahana ia Iehova e tae roa ˈtu i to ˈna poheraa. Te faaite papu atoa ra te reira i te mau mea atoa ta Davida e nehenehe e rave a muri aˈe, i te taime ïa e faahoˈi mai ai Iehova ia ˈna i te ora.