No te hoê noa mata ataata!

E mata ataata to Helen a tia noa ˈi i pihai iho i te vairaa papai e te haere ra e piti potii na mua mai.

A HAERE ai e piti potii na roto i te hoê oire tapihooraa i Baguio i te fenua Philipino, ua ite atu raua i te hoê iri faaiteraa papai, aita râ i haafatata ˈtu. I pihai iho i te iri faaiteraa papai, te tia ra Helen, te tahi tuahine o tei ata ˈtu ia raua. Ua tamau noa teie na potii i te haere, ua putapû roa râ raua i te mata ataata o Helen.

I muri aˈe, a hoˈi ai teie na potii i te fare na nia i te pereoo mataeinaa, ua ite raua i te hoê tapao jw.org i mua i te hoê Piha a te Basileia. Haamanaˈo atura e ua ite atoa raua na mua ˈtu i taua papairaa ra i nia i te iri faaiteraa papai. Pou atura raua no te haere e hiˈo i te mau hora putuputuraa.

Ua oaoa na potii i te iteraa ia Helen i te Piha a te Basileia.

I muri aˈe, ua apiti atu teie na potii i te hoê o te mau putuputuraa. O vai ta raua i ite a tomo atu ai i roto i te Piha a te Basileia? O Helen! Oioi roa raua i te taaraa i teie vahine mata ataata. Te na ô ra Helen: “A haere mai ai raua ia ˈu ra, ua manaˈo vau e hape paha ta ˈu i rave!” Ua faataa râ teie na potii ia Helen i te ohipa i tupu.

Ua oaoa roa teie na potii i te apitiraa mai i te putuputuraa, i te auhoaraa o te mau taeae e tuahine e ua oaoa atoa i te hoˈiraa ˈtu i te fare. A ite ai raua i te mau taeae e tuahine e tamâ ra i te Piha a te Basileia i muri aˈe i te putuputuraa, ua hinaaro atoa raua e tauturu ia ratou. Ua haere hoê o na potii e ora i te tahi atu fenua, area te tahi atu, ua haamata ïa i te apiti i te putuputuraa e i te haapii i te Bibilia. Ua tupu teie mau mea no te hoê noa mata ataata!