Uiraa a te feia taio

I roto i te Koheleta 5:8, no te feia faatere anei te parau e faahitihia ra aore ra no Iehova?

Te na ô ra tera irava: “Ia hiˈo oe i te taata rii i te hamani-ino-raahia, e te ruriraa i te ture e te parau-tia i te fenua nei, eiaha te rahi i te aueue i taua mea ra; o tei teitei ra hoi tei hiˈo i taua taata teitei ra, e o tei hau roa i te teitei ra tei hiˈo ia raua atoa.”—Koh. 5:8.

Te faataa maitai ra tera irava i te huru o te feia e faatere nei i teie mahana. Tera râ, te faaite atoa mai ra te reira i te hoê parau mahanahana no nia ia Iehova.

I roto i te Koheleta 5:8, te faahitihia ra te hoê taata teitei, aore ra faatere, o tei hamani ino e tei rave i te ohipa tia ore i nia i te taata riirii. Mea tano ia haamanaˈo taua taata teitei ra te hiˈohia ra oia e te hoê tei teitei aˈe ia ˈna. E peneiaˈe, te vai atoa ra te tahi atu e tiaraa teitei aˈe to ratou i to ˈna. Ma te peapea râ, mea piˈo te feia faatere atoa e te autâ ra te nunaa no te rahi o ta ratou mau ohipa ino.

Ia manaˈo tatou aita e ravea, e tamahanahanahia tatou ia ite te hiˈo ra Iehova i teie feia faatere piˈo. E nehenehe tatou e ani i te tauturu a te Atua e e huri i nia ia ˈna i to tatou ahoaho atoa. (Sal. 55:22; Phil. 4:6, 7) Ua ite hoi tatou “te hiˈo nei te mata o Iehova i to te ao atoa nei, ia horoa mai oia i te etaeta i te feia i tia te aau ia ˈna.”—Par. 2, 16:9.

No reira te haamanaˈo mai ra te Koheleta 5:8 noa ˈtu te huru o te feia faatere, te vai ra iho â te hoê e mana rahi aˈe to ˈna i to ratou. Te mea faufaa roa ˈtu, te haamanaˈo ra tera irava o Iehova tei Teitei roa ˈˈe, o ˈna hoi te Arii hau ê. Te faatere nei oia na roto i ta ˈna Tamaiti o Iesu Mesia, te Arii o ta ˈna Faatereraa arii. Te hiˈo ra Iehova i to te ao atoa, noa ˈtu râ to ˈna Manahope, e Atua parau-tia oia, e te pee atoa ra ta ˈna Tamaiti i to ˈna hiˈoraa.