ORARAA KERISETIANO
A paturu i ta Iehova mau ture aveia morare
Ua haamau te Atua ra Iehova i te mau ture aveia morare na te taata. Ei hiˈoraa, ua haamau oia i te faaipoiporaa ei taairaa i rotopu i te hoê tane e te hoê vahine no te oraraa taatoa. (Mt 19:4-6, 9) E faautua oia i te mau peu taotoraa tia ore atoa. (Ko1 6:9, 10) E horoa atoa oia i te mau aratairaa no nia i te faaahuraa e te huru faanehenehe o te faataa ê mai i to ˈna nunaa.—De 22:5; Ti1 2:9, 10.
I teie mahana, e rave rahi taata o te patoi ra i te mau ture aveia teitei a Iehova. (Ro 1:18-32) E vaiiho ratou i te manaˈo o vetahi ê e haa i nia i to ratou faaahuraa, huru faanehenehe e haerea. E rave rahi o te ore e huna i ta ratou mau haaraa tano ore e o te faahapa ra i te feia o te pee ra i te hoê ture aveia ê.—Pe1 4:3, 4.
Ei Ite no Iehova, mea titauhia ia haafaufaa maite tatou i ta te Atua mau ture aveia morare. (Ro 12:9) E nafea? Mea titauhia ia faaite tatou ma te mǎrû eaha te mea ta ˈna e farii. Mea titau-atoa-hia ia pee noa tatou i te mau ture aveia teitei i roto i to tatou iho oraraa. Ei hiˈoraa, ia maiti tatou i te hoê faaahuraa e huru faanehenehe, e uiui anaˈe: ‘Te faaite ra anei ta ˈu mau faaotiraa e te pee ra vau i te mau ture aveia a Iehova aore ra a to teie nei ao? Te faaite ra anei to ˈu faaahuraa e huru faanehenehe e e Kerisetiano vau o te mǎtaˈu ra i te Atua?’ Aore ra ia maiti tatou e mataitai i te hoê hohoˈa teata, e uiui paha tatou ia tatou iho: ‘E farii anei Iehova i teie hohoˈa teata? O te mau ture aveia a vai ta te reira e paturu? Eita anei ta ˈu mau faaanaanataeraa e haaparuparu ia ˈu i te pae morare? (Sal 101:3) E riro anei te reira ei faaturoriraa i te mau mero o te utuafare aore ra ia vetahi ê?’—Ko1 10:31-33.
No te aha mea faufaa ia haafaufaa tatou i ta Iehova mau ture aveia morare teitei? Fatata Iesu Mesia i te haamou i te mau nunaa e te ino. (Ezk 9:4-7) O te feia anaˈe o te rave i to te Atua hinaaro te ora mai. (Io1 2:15-17) E paturu anaˈe ïa i te mau ture aveia morare a Iehova, ia nehenehe te feia e ite mai ra i to tatou haerea maitai e faahanahana i te Atua.—Pe1 2:11, 12.
Eaha ta ta ˈu mau faaotiraa no nia i te faaahuraa e huru faanehenehe e faaite ra no nia i ta ˈu mau ture aveia morare?
A MATAITAI I TE VIDEO A RIRO EI HOA NO IEHOVA, HOÊ TANE, HOÊ VAHINE, E A PAHONO I TEIE MAU UIRAA:
No te aha e haerea î i te paari ia ora ia au i te mau ture aveia a Iehova?
No te aha mea tia ia haamata te mau metua i te haapii i te mau ture aveia morare a Iehova i ta ratou mau tamarii mai to ratou tamarii-rii-raa?
E nafea te feia apî e te feia paari e nehenehe ai e tauturu i te taata ia faufaahia ratou i te hamani maitai o te Atua?