A pee i te hiˈoraa o te mau peropheta: Habakuka
1. No te aha tatou e nehenehe ai e taa i te huru o te peropheta Habakuka?
1 Hoê â paha to tatou huru e to Habakuka a ite ai tatou i te ino e maraa ra i roto i teie nei ao. Ua ani oia ia Iehova: “Eaha ra hoi oe i faaite mai ai i te ino, e ia hiˈo hoi au i te oto ra?” (Hab. 1:3; Tim. 2, 3:1, 13) E mea faufaa ia feruri maite tatou i nia i te poroi ta Habakuka i faaite atu e i nia atoa i to ˈna hiˈoraa taiva ore a tiai noa ˈi tatou i te mahana haavaraa a Iehova.—Pet. 2, 3:7.
2. E nafea tatou e faatupu ai i te faaroo i roto i to tatou oraraa i teie mahana?
2 A faatupu i te faaroo: I mua i te mau tupuraa ino, aita Habakuka i toaruaru noa. Ua vai ara râ te peropheta i te pae varua e ua tavini noa oia ia Iehova. (Hab. 2:1) Ua tamahanahana te Atua ia ˈna ma te parau e e tupu iho â ta ˈNa i fafau i te taime tia e “o tei tiahia . . . i te faaroo ra, e ora ïa.” (Hab. 2:2-4) Eaha te auraa no te mau Kerisetiano e ora ra i te anotau hopea? Mea faufaa aˈe te iteraa e tae mai iho â te hopea i te iteraa e afea te reira e tae mai ai. Maoti te faaroo, e vai ara tatou i te pae varua e e tuu tatou i te taviniraa na mua roa i roto i to tatou oraraa.—Heb. 10:38, 39.
3. No te aha e titauhia ia tatou ia tapea i to tatou oaoa i roto i te taviniraa ia Iehova?
3 A oaoa ia Iehova: E tamatahia to tatou faaroo a aro ai Goga no Magoga i te nunaa a Iehova. (Ezk. 38:2, 10-12) E faatupu te tamaˈi i te mau fifi, i te feia atoa i upootia. Mea varavara paha te maa e e ere paha tatou i ta tatou mau faufaa. Eaha to tatou huru a faaruru ai i tera mau fifi? Ua ite Habakuka e e ite iho â oia i te mau fifi. Ua faaoti papu ïa oia e tapea i to ˈna oaoa i roto i te taviniraa ia Iehova. (Hab. 3:16-19) E tauturu mai ‘te oaoa no ǒ ia Iehova ra’ ia faaoromai noa ˈtu te mau fifi ta tatou e faaruru a muri aˈe.—Neh. 8:10; Heb. 12:2.
4. Eaha te oaoa ta tatou e nehenehe e ite i teie nei â mahana e a muri aˈe?
4 E paruru Iehova i to ˈna nunaa i ta ˈna mahana haavaraa. E tamau ratou i te fanaˈo i te haapiiraa no te ora ia au i te mau aratairaa a Iehova. (Hab. 2:14) E haapii atoa te mau taata tei faahoˈihia mai i te ora no nia ia Iehova. I teie nei â mahana, a faaohipa i te mau tupuraa atoa no te paraparau no nia ia Iehova e no nia i ta ˈna mau ohipa faahiahia!—Sal. 34:1; 71:17.