A pee i to ratou faaroo
1. Eaha ta tatou e hiˈopoa i te Haapiiraa Bibilia a te amuiraa mai te hebedoma o te 19 no Atopa?
1 E haamata tatou i te hiˈopoa i te buka A pee i to ratou faaroo i te Haapiiraa Bibilia a te amuiraa i te hebedoma o te 19 no Atopa 2015. Maoti teie papai e hiˈopoa ˈi tatou i te aamu o na 14 tane e vahine faaroo. Ua papaihia teie buka no te tauturu ia tatou ia feruri i nia i to ratou hiˈoraa e ia taa ia tatou e e taata mau ratou o tei faaruru i te mau fifi a tavini ai ia Iehova. Maoti teie mau aamu e huti ai tatou i te mau haapiiraa o te tauturu ia tatou i te mau mahana atoa.—Heb. 6:12.
2. A faataa eaha te tahi mau tuhaa o te buka A pee i to ratou faaroo.
2 Te mau tuhaa: I roto i tera buka, e itehia te hoê hohoˈa tau e te tahi mau hohoˈa fenua no te tauturu ia tatou ia ite afea e ihea te taata taitahi i ora ˈi. Hau atu â, te vai ra te tuhaa “Eaha to oe manaˈo?” i roto i te pene taitahi. E tauturu te reira ia tatou ia feruriruri i te mau aamu e ia faaohipa i te mau haapiiraa ta tatou i huti mai. I roto i tera buka, e rave rahi atoa hohoˈa mea nehenehe te ǔ. E rave rahi atoa haamaramaramaraa i nia i teie mau hohoˈa. Ua feruri-maitai-hia te reira no te tauturu ia tatou ia faaohipa i to tatou feruriraa ia papu ia tatou i teie mau aamu.
3. Eaha ta tatou e rave ia faufaahia tatou i te haapiiraa o teie buka?
3 E nafea oe e faufaahia ˈi? E tauturuhia tatou maoti te mau parau o te rata a te Tino aratai e vai ra i te omuaraa: “A faaohipa i to outou feruriraa e to outou mau tumu ite. A tamata i te faatupu i te huru aau o tera mau tavini o te Bibilia, i te ite i ta ratou i ite. A faaau i ta ratou i rave i roto i te hoê tupuraa e ta outou atoa e rave ahani o outou aˈe tera.” Parau mau, e faaohipa tatou i to tatou feruriraa no te ite eaha ta te aamu Bibilia e faaite ra e no te taa i te mau manaˈo hohonu o te taata. Aita râ tatou e tataˈu i nia i te reira. E titauhia ïa te taime no te feruriruri i tera mau aamu. (Neh. 8:8) Ia haamata te haapiiraa i ropu i te hoê pene, e rave te taata faatere e 30 aore ra 60 tetoni no te haamanaˈo i to na mua ˈtu haapiiraa. E nehenehe oia e tuu hoê aore ra piti uiraa haamanaˈoraa i ta ˈna mau parau hopea aita anaˈe te tuhaa “Eaha to oe manaˈo?” i roto i te haapiiraa.
4. No te aha e mea faufaa ia haapii i te buka A pee i to ratou faaroo?
4 Te ora nei tatou i roto i te hoê ao o te tamata i te mau mahana atoa i te haafifi aore ra i te haaparuparu i to tatou faaroo. E ô teie buka no ǒ mai ia Iehova. Oia atoa te mau tumu parau “A pee i to ratou faaroo” e vai ra i roto i Te Pare Tiairaa. (Iak. 1:17) E tauturu te reira ia tatou ia haapuai i to tatou faaroo. E haafaufaa roa anaˈe ïa i tera buka ma te haere tamau i te Haapiiraa Bibilia a te amuiraa e ma te pahono atoa a haapii ai tatou pauroa i teie papai!