Ia tutava tatou i te faariro i te taata ei pǐpǐ
1. Eaha te titauhia ia rave ia nehenehe te taata e fanaˈo i te ora?
1 I 2014, ua faaite te tapura taviniraa matahiti e e itoito rahi to te Atua nunaa e te hinaaro nei iho â ratou e poro i te parau apî oaoa o te Basileia. (Mat. 24:14) Maoti te pororaa i tera e tera fare, te pûpûraa i te mau api parau e titau-manihini-raa aore ra te pororaa i te vahi taata, te faaite nei tatou i te poroi Bibilia i e rave rahi atu â taata. Ia nehenehe râ te taata taitahi e fanaˈo i te ora, e mea tia ia tauturu ia ratou ia riro ei pǐpǐ a Iesu ma te faatere i ta ratou haapiiraa Bibilia.—Tim. 1, 2:4.
2. Eaha te tia ia ui ia tatou iho ia ineine noa tatou no te pûpû i te haapiiraa Bibilia?
2 Ia ineine noa tatou no te pûpû i te haapiiraa Bibilia: Ia anaanatae te taata i te poroi, e tutava anei tatou i te ite e nafea ia farerei faahou ia ˈna? I muri iho, e rave oioi anei tatou i te faanahoraa no te farerei ia ˈna e no te faatere i ta ˈna haapiiraa Bibilia? Inafea tatou i te faaiteraa e eaha te ravehia i te hoê haapiiraa Bibilia i te farereiraa matamua? Inafea tatou i te pûpûraa i te hoê haapiiraa Bibilia i te taata o ta tatou tapura opereraa vea? Ua faaite ê na anei tatou i te mau video No te aha e haapii ai i te Bibilia? aore ra Eaha te ravehia i te hoê haapiiraa Bibilia? i ta tatou mau hoa ohipa, hoa haapiiraa, taata tapiri, fetii aore ra te tahi atu taata? Ia rave te taata i te tahi papai haapiiraa i nia i te vairaa papai, e faaite atoa anei tatou ia ˈna e e nehenehe oia e fanaˈo i te hoê haapiiraa Bibilia tamoni ore?
3. No te faariro i te taata ei pǐpǐ, eaha te titauhia ia rave?
3 Te tauturu no ǒ mai ia Iehova e ia Iesu: Ua haamata Iesu i ta ˈna faaueraa ia ‘faariro i te taata ei pǐpǐ’ ma te faaohipa i te taˈo “haere.” Te faaite ra ïa oia e mea tia ia rave i te taahiraa matamua e i te mau tutavaraa. Eita râ Iesu e faarue ia tatou. Ua parau mai hoi e tei pihai iho oia ia tatou. (Mat. 28:19, 20) E horoa atoa mai Iehova i to ˈna varua moˈa, te mau mauhaa e te mau ravea no te faaineine ia tatou ia haapii i te parau mau ia vetahi ê. (Zek. 4:6; Kor. 2, 4:7) E nehenehe tatou e pure ia ‘hinaaro e ia rave’ tatou i teie ohipa faufaa roa.—Phil. 2:13.
4. No te aha e mea tia ˈi ia tutava tatou i te faariroraa i te taata ei pǐpǐ?
4 E oaoa rahi ta tatou e ite a poro ai i te parau apî maitai. E rahi atu â râ tera oaoa a haapii ai tatou i te parau mau i te taata e a tauturu ai ia ratou ia apiti ia tatou i nia i “te eˈa e tae atu ai i te ora.” (Mat. 7:14; Tes. 1, 2:19, 20) E te mea faufaa roa ˈˈe, ia tutava tatou i te faariroraa i te taata ei pǐpǐ, e faaoaoa tatou ia Iehova tei ore e “hinaaro e ia pohe atu te hoê, ia noaa paatoa râ te tatarahapa.”—Pet. 2, 3:9.