A haapii maoti te hiˈoraa o te feia poro aravihi aˈe

Mea faufaa roa te feia poro aravihi o te amuiraa no tatou. Te vai ra vetahi o te tavini nei ia Iehova ma te taiva ore e rave rahi matahiti i teie nei e te vai ra o tei haamata i te taviniraa aita i maoro aˈenei. Ua ite teie feia poro aravihi e nafea Iesu i faatere ai i te amuiraa Kerisetiano i teie tau hopea. Ua haaparare hoi oia i te ohipa pororaa e e rave rahi atu â taata tei riro ei pǐpǐ. (Mat. 28:19, 20) Ua apiti te feia poro aravihi i teie taviniraa e ua fanaˈo ratou i “te mana rahi maitai” a faaruru ai i te mau fifi aore ra tamataraa. (Kor. 2, 4:7) E rave rahi haapiiraa te nehenehe e huti mai i to ratou hiˈoraa. Mea au roa na teie feia poro aravihi e paraparau ia vetahi ê no nia i ta ratou i haapii. (Sal. 71:18) No reira, a imi i te ravea no te haapii maoti to ratou hiˈoraa. E nafea ïa?

I roto i te taviniraa: Mea faufaa ia tauturu i te feia poro apî ia aravihi atu â i roto i te taviniraa. Oia atoa i te feia e ere i te mea aravihi roa. E haapii rahi ratou ma te hiˈo e nafea te feia aravihi aˈe e poro ai. (A hiˈo i Te Pare Tiairaa o te 15 no Fepuare 2015, “Tapea i to oe itoito rahi no te taviniraa,” i te paratarafa toru i raro aˈe i te upoo parau “A tauturu i te taata poro apî.”) E nafea oe i faufaahia ˈi i te pororaa e te feia aravihi aˈe?

E nehenehe anei oe e titau manihini i te hoê taata poro aravihi ia apiti ia oe i roto i te taviniraa? Mai te peu e e mea maˈimaˈi o ˈna, a faatere i te tahi taime i te hoê haapiiraa Bibilia i to ˈna fare. Ia oti te haapiiraa, a ani ia ˈna eaha te tia ia haamaitai.

A faataa i te taime no ratou: A haamatau e te feia poro aravihi ma te faataa i te taime no ratou. A titau manihini hoê o ratou i ta oe haamoriraa utuafare e a uiui i to ˈna manaˈo. Mai te peu e e mea maˈimaˈi o ˈna, a rave i te mau faanahoraa no te faatere i te haamoriraa utuafare i ǒ ˈna. A ani e nafea oia i ite ai i te parau mau. Eaha te mau haamaitairaa ta ˈna i fanaˈo? Eaha te maraaraa i roto i te taviniraa ta ˈna i ite i to ˈna fenua? Eaha te mau tupuraa oaoa ta ˈna i ite a tavini ai ia Iehova?

A hiˈo i te tupuraa o te feia poro e mea maoro i roto i te parau mau. Eiaha e ani hou aˈe i ta ratou e nehenehe e rave. Mai ia tatou, mea taa ê to ratou aravihi i roto i te taviniraa i to te tahi atu. (Roma 12:6-8) Mea ruhiruhia te tahi e mea fifi ïa no ratou ia faataa ˈtu â i te taime e o tatou. Tera râ, e rave rahi haapiiraa te nehenehe e huti mai i to ratou hiˈoraa ei tavini taiva ore a Iehova.