Rata a te Tino aratai

E te mau taeae e tuahine here e:

“Te haamaitai nei matou i te Atua ia outou atoa aita e faaea, i te faahitiraa ia outou i ta matou nei pure; aore hoi e faaea i te manaˈo i te rave papu o to outou faaroo, e te ohipa rahi o to outou hinaaro, e te faaoromai tamau o to outou tiaturi i to tatou Fatu ia Iesu Mesia, i te aro o te Atua o to tatou ra Metua.” (Tes. 1, 1:2, 3) Na teie mau parau nehenehe mau e faaite i to matou huru aau no outou! Te haamauruuru nei matou ia Iehova no te mea te vai ra outou. Oia atoa no te mau ohipa maitai ta outou e rave ra.

I te matahiti i mairi aˈenei, ua ohipa outou no te Basileia ma te taiva ore e ma te here. E rave rahi tei rave i te mau faanahoraa no te poro atu â. Te vai ra o tei haere e tavini i te mau tuhaa fenua aore ra fenua ê e mea hinaaro-rahi-hia te taata poro i te Basileia. Te vai atoa ra o tei poro i te vahi taata. E rave rahi tei riro ei pionie tauturu i te tau o te Oroa haamanaˈoraa, i te avaˈe a tere mai ai te tiaau haaati aore ra i te tau opereraa taa ê i Atete 2014. Noa ˈtu e e ere hoê â tupuraa ta outou, te ohipa noa ra outou no Iehova ma te aau atoa. Ua ite matou i te reira e te haapopou nei matou ia outou. (Kol. 3:23, 24) Ua vai taiva ore outou i roto i te taviniraa. E tumu te reira e haamauruuru ai matou ia Iehova!

Hau atu â, ua ohipa outou ma te here e ua itehia te reira i te paturaa o e rave rau piha faaohipahia e te mau Ite no Iehova na te ao nei. Ua mauruuru roa matou i ta outou i rave. E hinaaro-ru-hia hoi teie mau paturaa, inaha te rahi noa ra te nunaa o Iehova. (Isa. 60:22) A hiˈo na! I te matahiti i mairi aˈenei, teie te numera rahi aˈe o te mau taata poro: 8 201 545. E ua faaterehia e 9 499 933 haapiiraa Bibilia i te avaˈe taitahi. No reira e titauhia ˈi ia faararahi aore ra ia faaapî e rave rahi Betela. Parau mau, e hinaaro-atoa-hia e rave rahi atu â Piha a te Basileia! Oia atoa i te mau piha ohipa no te mau pǔpǔ huriraa tei afaihia i te tahi atu vahi. E nehenehe ïa te feia huri e ora e e ohipa i te vahi e paraparauhia to ratou reo.

E ui anaˈe ïa: “Eaha ta ˈu e nehenehe e rave no te turu i te ohipa paturaa?” Te vai ra o te nehenehe e riro ei rima tauturu. Noa ˈtu e e ere tatou i te mea aravihi i roto i te paturaa, e fanaˈoraa taa ê ta tatou pauroa ia horoa i ta tatou mau taoˈa no te turu i teie mau opuaraa faufaa. (Mas. 3:9, 10) I te tau paturaa o te sekene, ua hinaaro rahi te mau ati Iseraela e horoa. E mea tia roa ia faaara ia ratou ia faaea i te horoa ˈtu â. (Exo. 36:5-7) Papu maitai, e haaputapû teie mau hiˈoraa i to tatou aau e e turai atoa mai ia faaite i te huru horoa noa. Ua rave outou i te ohipa ma te here i roto i teie mau tuhaa faufaa o te taviniraa moˈa. E tumu atoa te reira e haamauruuru ai matou ia Iehova!

E tumu taa ê e oaoa ˈi matou. Te ite nei hoi matou i te faaoromai taiva ore o to tatou mau taeae. A hiˈo na i to tatou mau taeae here no Korea Apatoa. Mai 1950 mai â, ua tuuhia te mau taeae apî o taua fenua ra i te fare tapearaa no to ratou tiaraa amui ore Kerisetiano. E ere râ hoê â maororaa to ratou tapearaahia. E rave rahi o ratou o tei faaoromai i teie tupuraa ma te aueue ore. Te haapuai nei to ratou faaoromai i to matou faaroo!

I Érythrée, ua tapeahia e toru o to tatou mau taeae e hau atu i te 20 matahiti i te maoro. Mea poto aˈe râ te taime tapearaa no te tahi atu, mai to tatou mau tuahine e ta ratou tamarii. E rave rahi tutavaraa tei ravehia no te faatiamâ mai ia ratou. Aita râ i manuïa. Noa ˈtu râ, ua tapea noa ratou i to ratou tiaraa amui ore Kerisetiano. Ua vai hapa ore to tatou mau taeae i mua i te mau tupuraa atâta. Te pure noa nei matou no teie mau taeae taiva ore.—Roma 1:8, 9.

Oia mau, aita te rahiraa o outou e tapeahia ra no to outou faaroo. Tera râ, e rave rahi o outou o te faaruru nei i te mau faahopearaa o te matahiti rahi, te mau fifi tamau o te ea e te patoiraa a te hoa faaipoipo aore ra melo o te utuafare e ere i te Ite no Iehova. Oia atoa i te tahi atu mau fifi ta outou anaˈe i ite. Noa ˈtu te reira, te tamau noa nei outou i te tavini ia Iehova ma te hapa ore! (Iak. 1:12) Te haapopou nei matou ia outou no to outou faaoromai taiva ore. E tumu atoa te reira e haamauruuru ai matou ia Iehova!

Papu maitai, te ohipa ra outou ma te taiva ore, te here e te faaoromai. E tumu faahiahia mau te reira o te turai nei ia matou ia “arue ia Iehova; e maitai hoi to ˈna.” (Sal. 106:1) Te here mau nei matou ia outou paatoa e te pure nei matou ia Iehova ia haapuai, tauturu e haamaitai oia ia outou. E nehenehe ïa outou e tavini ia ˈna e a muri noa ˈtu.

To outou mau taeae,

Tino aratai a te mau Ite no Iehova