A aravihi atu â ei taata poro
1. Eaha te mau hiˈoraa Bibilia o te senekele matamua o te haapapu ra e e mea titauhia ia aravihi atu â ei taata poro?
1 E mea titauhia i te mau Kerisetiano ia aravihi atu â ei taata poro. No reira Iesu i faaineine mǎrû noa ˈi i ta ˈna mau pǐpǐ no te ohipa pororaa. (Luka 9:1-5; 10:1-11) No reira atoa o Akuila e Perisila i rave ia Apolo ia raua ra e i ‘faataa maite atu â ia ˈna i te parau a te Atua.’ (Ohi. 18:24-26) E no reira Paulo i faaitoito ai i te taata poro aravihi ra o Timoteo ia tamau i te vai ara i ta ˈna huru haapiiraa ia vetahi ê. E ite ïa te taata atoa e ua riro oia ei Kerisetiano feruriraa paari. (Tim. 1, 4:13-15) Noa ˈtu ehia maororaa tatou i roto i te taviniraa i te Fatu ei taata poro o te parau apî oaoa, e mea tia ia aravihi atu â i roto i te pororaa.
2. E nafea tatou e haapii ai maoti te hiˈoraa o vetahi ê?
2 A haapii maoti te hiˈoraa o vetahi ê: E nehenehe tatou e aravihi atu â ma te haapii maoti te hiˈoraa o vetahi ê. (Mas. 27:17) A faaroo maitai ïa i to oe hoa pororaa a poro ai oia. A ani i te tauturu hinaarohia i te feia poro aravihi e a faaroo maitai i ta ratou e parau atu. (Mas. 1:5) Mea fifi anei no oe ia hoˈi faahou e farerei i te hoê taata, ia haamata i te hoê haapiiraa Bibilia aore ra ia apiti i te tahi atu tuhaa o te pororaa? A haere ïa e ani i te tauturu i te tiaau no te pǔpǔ pororaa aore ra i te tahi taata poro aravihi. A haamanaˈo atoa e e nehenehe te varua moˈa o Iehova e tauturu ia oe ia aravihi atu â. A tamau ïa i te ani i te reira na roto i te pure.—Luka 11:13.
3. Eaha to tatou huru ia horoahia ˈtu te tahi manaˈo tauturu, noa ˈtu e aita tatou i ani atu?
3 Eiaha e inoino ia horoahia ˈtu te tahi manaˈo tauturu, noa ˈtu e aita oe i ani atu i te reira. (Koh. 7:9) Mai ia Apolo, a farii i te tauturu ma te haehaa e te mauruuru. E faaite ïa oe i te paari.—Mas. 12:15.
4. Eaha te tumu faufaa roa ta Iesu i horoa mai ia aravihi atu â tatou ei taata poro?
4 E faahanahanahia te Atua ia aravihi atu â tatou: Maoti te tahi faahohoˈaraa, ua faaitoito Iesu i ta ˈna mau pǐpǐ ia aravihi atu â ei taata poro. Ua faaau oia ia ˈna iho ei vine e ta ˈna mau pǐpǐ faatavaihia ei amaa. Ua parau oia e e tope te Metua i te mau amaa hotu atoa “ia rahi atu â te hotu.” (Ioa. 15:2) Mai te hoê fatu ô vine o te hinaaro ia rahi atu â te mau hotu o te mau amaa, e hinaaro atoa Iehova ia aravihi atu â tatou no te faatupu i te hotu “ta te vaha nei.” (Heb. 13:15) Eaha te faahopearaa maitai ia aravihi atu â tatou ei taata poro? Teie ta Iesu e pahono ra: “O te mea ïa e maitai ai tau Metua, ia rahi to outou hotu.”—Ioa. 15:8.