E tauturu te Haapiiraa no te taviniraa Kerisetiano 2015 ia aravihi atu â i roto i to tatou huru haapiiraa ia vetahi ê

¹ Ua papai te fatu salamo o Davida e: ‘E tiahia mai te parau a to ˈu vaha i reira, e te manaˈo o to ˈu aau, i mua i te aro, e Iehova, e ta ˈu haapuraa e to ˈu ora.’ (Sal. 19:14) E hinaaro atoa tatou e faaoaoa ia Iehova maoti ta tatou mau parau. E poihere hoi tatou i ta tatou haamaitairaa ia faaite i te parau mau i te mau putuputuraa e i te pororaa. E faaohipa Iehova e rave rahi mau ravea no te faaineine ia tatou no te pororaa, mai te Haapiiraa no te taviniraa Kerisetiano. Pauroa te mau hebedoma, e ravehia tera haapiiraa i roto hau atu e 111 000 amuiraa na te ao nei. Maoti te reira, e riro te mau taeae e tuahine no te mau fenua atoa e no te mau huru oraraa atoa ei taata poro aravihi. E nehenehe ïa ratou e haapii atu ma te papu, te tura e te mǎtaˈu ore.—Ohi. 19:8; Kol. 4:6.

² I te Haapiiraa no te taviniraa Kerisetiano no 2015, e vauvauhia te mau tumu parau itehia i roto i te Introduction à la Parole de Dieu e te tahi atu mau papai Bibilia. Ua faatano-atoa-hia te taime faaotihia no te mau manaˈo faufaa o te taioraa Bibilia e te vauvauraa n^o 1. E hiˈopoahia tera mau faatanoraa e te mau faaueraa no te mau tuhaa o te haapiiraa i to muri nei mau paratarafa.

³ Manaˈo faufaa o te taioraa Bibilia: E piti minuti to te mau taeae na ratou tera tuhaa no te tatara hoê noa ˈˈe manaˈo faufaa o te taioraa Bibilia tahebedoma. E titauhia te faaineine-maitai-raa no te hiˈopoa i tera manaˈo faufaa e te amuiraa i roto i te taime faaotihia. I muri iho, mai tei matauhia, e ono minuti to te amuiraa no te faahiti i te mau manaˈo faufaa ta ratou i ite i roto i ta ratou taioraa Bibilia. Eiaha te pahonoraa taitahi ia mairi e 30 tetoni. E titauhia ïa te faaineineraa e te faatura no te horoa i te hoê pahonoraa maitai i roto i te taime faaotihia. E ere i te mea ohie, e faaineineraa maitai râ te reira no tatou. E nehenehe atoa e rave rahi taata e faaite i ta ratou i haapii maoti ta ratou iho mau maimiraa.

⁴ Vauvauraa n^o 1: Ua faaitihia te taime no te taioraa Bibilia e toru minuti aore ra iti aˈe. Ia na reira, e iti atoa mai ïa te tuhaa faataahia. E faaineine te mau taata na ratou tera vauvauraa ia ratou iho ma te taio na mua ˈtu i te reira e rave rahi taime ma te reo puai. E vai ara atoa ratou ia taio ma te maramarama e te maumau ore. E faaitoitohia to Iehova nunaa ia taio maitai, e mea faufaa hoi te reira i roto i ta tatou haamoriraa. Auê i te oaoa e ia ite e te taio maitai ra e rave rahi o ta tatou mau tamarii! E mea tia ia haapopou i te mau metua no ta ratou mau tutavaraa î i te here no te tauturu i ta ratou mau tamarii ia aravihi atu â i roto i te taioraa.

⁵ Vauvauraa n^o 2: Na te hoê tuahine e vauvau i tera tuhaa na roto e pae minuti. E faaohipa o ˈna i te tumu parau i faataahia. To nia anaˈe te vauvauraa i te hoê taata i roto i te Bibilia aore ra parau no roto mai i te papai Kerisetiano, e hiˈopoahia te mau manaˈo ia au i te itehia i roto i te tuhaa fenua. E maiti atoa oia i te mau irava ta ˈna e taio e e faaite atu eaha te haapii mai i te mau hiˈoraa Bibilia. E nehenehe e faaohipa atoa i te tahi atu irava Bibilia, ia tano râ te reira i te tumu parau. Na te tiaau no te haapiiraa e maiti o vai te apiti.

⁶ Vauvauraa n^o 3: Na te hoê taeae aore ra tuahine e vauvau i tera tuhaa na roto e pae minuti. Ia horoahia te vauvauraa i te tahi tuahine, e haapao oia i te aratairaa i faaitehia ˈtu na i te vauvauraa n^o 2. Ia horoahia râ te reira i te hoê taeae, e rave oia i te vauvauraa mai te hoê oreroraa parau ra te huru. E vauvau te piahi i te tumu parau faataahia, maiti i te mau irava Bibilia tano e faaite eaha te haapii mai maoti te hiˈoraa o te hoê taata Bibilia.

⁷ Hoê tuhaa apî o te vauvauraa n^o 3 no te mau taeae: Ia niuhia te vauvauraa i nia i te Introduction à la Parole de Dieu, e ravehia te reira ma te faaohipa i te tahi faahiˈoraa o te Haamoriraa utuafare aore ra te tahi tupuraa itehia i roto i te tuhaa fenua. Mai tei matauhia, na te tiaau no te haapiiraa e maiti i te apiti e te huru tupuraa. O te hoê melo utuafare aore ra te hoê taeae o te amuiraa ïa te apiti o te piahi. E nehenehe atoa te piahi e faaohipa i te tahi atu irava o te faaite ra i te aratairaa Bibilia, ia tano râ te reira i te tumu parau. I te tahi taime, na te hoê matahiapo e vauvau i tera tuhaa. Na ˈna ïa e maiti i to ˈna apiti e huru tupuraa. Papu maitai, e itoitohia te amuiraa ia vauvau te mau matahiapo i tera tuhaa ma te aravihi apitihia e te hoê melo utuafare aore ra te tahi atu taeae.

⁸ Aˈoraa: Ia oti te vauvauraa taitahi, e piti minuti to te tiaau no te haapiiraa no te haapopou i te piahi e no te faataa ˈtu i te ohipa maitai i ravehia. E faahiti oia i ta te buka Tirez profit de l’École du ministère théocratique e parau ra. Ia titau te tiaau i te piahi no ta ˈna vauvauraa, eita oia e faaite i te haapiiraa a te piahi. I muri aˈe râ i te vauvauraa e te tahi mau parau haapopou, e faaite te tiaau i te haapiiraa a te piahi e no te aha ua rave maitai o ˈna i te reira. Ia tano, e faataa ˈtu te tiaau ma te mǎrû no te aha e faufaahia ˈi te piahi ia haapao faahou â i te haapiiraa.

⁹ E itehia te mau aratairaa no te piahi i te api 79 e tae atu i te api 81 o te buka École du ministère. I muri aˈe i te vauvauraa, e papai te tiaau no te taviniraa i te mau nota e tano i roto i ta te piahi buka. E ani atoa oia o raua anaˈe mai te peu e ua rave te piahi i te ohipa taaihia i te haapiiraa faataahia. E haapopou te tiaau i te piahi e e horoa ˈtu oia i te tahi atu mau manaˈo tauturu i muri aˈe i te putuputuraa aore ra i te tahi atu taime. E tauturu te reira i te piahi taitahi ia haere i mua i te pae varua.—Tim. 1, 4:15.

¹⁰ Ia mairi te vauvauraa i te taime faaotihia, e mea tia ia vai ineine te tiaau no te taviniraa aore ra te tahi atu taata tauturu no te faaite i te reira. E nehenehe ïa oia e faataˈi i te ôe ma te au noa aore ra faaohipa i te tahi atu ravea ma te tano. E haapao ïa te piahi i te reira ma te faaoti i ta ˈna e parau ra e ma te pou mai nia mai i te tahua.—A hiˈo i te buka École du ministère, api 282, par. 4.

¹¹ E faaitoitohia pauroa te mau taata o te faaî ra i te mau titauraa ia riro ei piahi o te Haapiiraa no te taviniraa Kerisetiano. (A hiˈo i te buka École du ministère i te api 282, par. 6.) E tauturu teie haapiiraa i to Iehova nunaa ia poro e ia haapii atu i te parau apî maitai o te Basileia ma te papu, te tura e te here. E faufaahia te mau piahi i teie haapiiraa Kerisetiano. E oaoa iho â Iehova i te ite ia ratou pauroa ia faahanahana ia ˈna!—Sal. 148:12, 13; Isa. 50:4.