Ia aravihi atu â i roto i te taviniraa—A tâuˈa ia vetahi ê

No te aha e mea faufaa ˈi? Ua tâuˈa Iesu i te taata taitahi e ua faaite oia i te reira ma te here. Ei hiˈoraa, i te hoê mahana, ua ite Iesu e ua huru ê te tahi taata tariˈa turi i te vahi taata. No te faaora ia ˈna, ua aratai Iesu ia ˈna i te tahi atu vahi o raua anaˈe. (Mar. 7:31-35) Ua faatura atoa Iesu i ta ˈna mau pǐpǐ. Ua haamanaˈo oia e e taotiaraa to ratou e aita oia i faateimaha atu i e rave rahi mau haamaramaramaraa. (Ioa. 16:12) Ua tâuˈa atoa te Mesia ia vetahi ê noa ˈtu e e Arii oia i nia i te raˈi. (Tim. 2, 4:17) Ei pǐpǐ a Iesu, te hinaaro nei tatou e pee i to ˈna hiˈoraa. (Pet. 1, 2:21; Ioa. 1, 3:16, 18) E aravihi atu â tatou i roto i te taviniraa ia tâuˈa tatou i te taata e ia taa eaha to ˈna iho tupuraa, hinaaro aore ra tapitapiraa. E hinaaro paha oia e faaroo ia tatou a ite ai e aita tatou i haere mai no te faaite noa i te hoê poroi aore ra vaiiho i te tahi papai, no te faaite atoa râ e te tâuˈa nei tatou ia ˈna.

Nafea ïa?

A faaineine maitai ia oe. Eiaha e ru, a faaite i te mata ataata e te huru auhoa.
A hiˈo maite. E tamarii anei ta te taata? Mea au roa anei na ˈna te ohipa faaapu? E animara anei ta ˈna? E faaroo anei ta ˈna? Peneiaˈe e nehenehe oe e faatano i te omuaraa parau ia au i te taata.
A ui i to ˈna manaˈo e a faaroo maitai ia ˈna ma te ore e tâpû hanoa i te parau. A tamau i te hiˈo i te taata no te faaite e te faaroo mau nei oe ia ˈna. A haamauruuru atu no ta ˈna mau parau e a haapopou atu ma te haavare ore. Eiaha roa ˈtu e mârô.
A faatanotano i ta oe mau parau ia au i ta te taata tapitapiraa. E mea ohie roa ia na reira inaha e rave rahi tumu parau i roto i ta tatou mau api parau, buka rairai e vea. Mai te peu e e ohipa ta te taata, a haapao maitai i te reira e a haapoto i ta oe faaiteraa.

Ta oe e rave i teie avaˈe:

A tamata i te rave i te reira i te haamoriraa utuafare aore ra i roto i te pororaa ma te faatano i ta oe faaiteraa i nia i ta taata e parau.
I te tahi mau putuputuraa no te pororaa, e nehenehe te taeae faatere e faataa aore ra rave i te hoê faahiˈoraa no te faaite e nafea tatou e tâuˈa ai ia vetahi ê.