Ia hiˈo Iehova ia ˈu, eaha ta ˈna e ite ra?
1. No te aha e au ai te Bibilia i te hoê hiˈo?
1 E pinepine anei oe i te hiˈo ia oe iho i roto i te hoê hiˈo? E na reira te rahiraa o tatou i te mau mahana atoa no te ite teihea tuhaa o to tatou huru rapaeau e tia ia haapao. Ua faaauhia te Bibilia i te hoê hiˈo. E tauturu mai te taioraa i te Parau a te Atua ia ite i to tatou huru o roto, te huru taata ïa ta Iehova e ite ra. (Sam. 1, 16:7; Iak. 1:22-24) O te Bibilia “te hiˈopoa hoi i te manaˈo e te opua o te aau ra.” (Heb. 4:12) E nafea te taioraa e te feruri-maite-raa i te Bibilia i te mau mahana atoa e tauturu ai ia haamaitai i te tahi mau tuhaa o to tatou oraraa no te aravihi atu â i roto i te pororaa?—Sal. 1:1-3.
2. E nafea te Bibilia e tauturu ai ia tatou ia hiˈopoa ia tatou iho?
2 A faaohipa i te Bibilia mai te hoê hiˈo: Te haapii ra te mau faatiaraa Bibilia o te mau tavini taiva ore a Iehova eaha te mau huru maitatai ta ˈNa e au ra. Ei hiˈoraa, ua faaite Davida i to ˈna itoito rahi no te iˈoa o te Atua. (Sam. 1, 17:45, 46) Ua poro Isaia ma te itoito i roto i te hoê tuhaa fenua fifi mau. (Isa. 6:8, 9) Ua riro ta Iesu taviniraa ei tamahanahanaraa mau e ei oaoa no ˈna, eiaha râ ei ohipa teimaha. Na to ˈna here mau i to ˈna Metua i te raˈi tei tauturu ia ˈna ia na reira. (Ioa. 4:34) Ua poro te mau Kerisetiano matamua ma te itoito rahi, ua tiaturi ratou ia Iehova e ua faaoti ratou eiaha e tuu. (Ohi. 5:41, 42; Kor. 2, 4:1; Tim. 2, 4:17) E tauturu te feruri-maite-raa i tera mau hiˈoraa ia hiˈo ia tatou iho no te haamaitai i ta tatou taviniraa moˈa.
3. No te eaha eiaha tatou e faataere i te rave i te mau faatanoraa tia?
3 A faatano i te tahi mau huru au ore: Eita tatou e faufaahia ˈi ia ore e haapao i te tahi huru au ore a hiˈo ai ia tatou iho i roto i te hoê hiˈo. E nehenehe tatou e ani i ta Iehova tauturu no te hiˈo ia tatou iho ma te tano e no te rave i te mau faatanoraa e titauhia. (Sal. 139:23, 24; Luka 11:13) E mea poto roa te taime e toe ra e e ati to mua. Eiaha ïa e faataere i te rave i te mau faatanoraa tia.—Kor. 1, 7:29; Tim. 1, 4:16.
4. Eaha te tupu ia hiˈo te taata i roto i te Parau a te Atua e ia faaohipa o ˈna i ta ˈna i haapii?
4 Mea faufaa aˈe te huru o roto o te hoê taata, ta Iehova e ite ra, i to ˈna huru rapaeau. (Pet. 1, 3:3, 4) Eaha te tupu ia hiˈo te taata i roto i te Parau a te Atua e ia faaohipa o ˈna i ta ˈna i haapii? “E ere oia i te taata e moina noa te parau ia faaroo ra, e taata rave râ oia i taua ohipa ra, e haamaitaihia ïa oia i ta ˈna ra raveraa.” (Iak. 1:25) Oia mau, e oaoa tatou e e aravihi atu â tatou i roto i te pororaa no te mea mai te hoê hiˈo ra te huru, te faaite ra tatou i te hanahana o Iehova.—Kor. 2, 3:18.