Pahonoraa i ta outou mau uiraa

◼ Eaha te titauhia i te mau tamarii ia haapii ia paari ratou i te pae varua?

E ohipa rahi te mau metua Kerisetiano no te haapii i ta ratou mau tamarii ia paari ma te aˈo a Iehova. (Eph. 6:4) Ei hiˈoraa, ua ite te mau metua i te faufaaraa ia hiˈopoa i te irava mahana e ta ratou mau tamarii i te mau poipoi atoa. I te haamoriraa utuafare aore ra te tahi atu mau taime, e mataitai paha te mau utuafare i te tahi video a tauaparau atu ai i nia i te reira. E tauaparau atoa ratou i nia i te tahi mau tumu parau o te buka Les jeunes s’interrogent. E hauti vetahi i te hoê aamu Bibilia aore ra e faaineine ratou no te pororaa. Ia haere râ te mau tamarii “i mua i te paari mau,” e mea faufaa ia haapiihia ratou i te pue parau mau hohonu o te Bibilia.—Heb. 6:1.

Eaha ta tatou e haapii ra i te mau taata i roto i te tuhaa fenua? I te farereiraa matamua aore ra ia hoi faahou tatou, e tutava tatou i te haamata i te haapiiraa Bibilia. E faaohipahia te buka Eaha ta te Bibilia e haapii mau ra? Ia hope te reira, e ravehia te buka “Ia vai maite outou i roto i te here o te Atua.” No te aha? E horoa te buka Bibilia haapii i te mau piahi i te ite tumu i te Bibilia. E haapii te buka “Te here o te Atua” ia ratou e nafea ia faaohipa i te mau faaueraa tumu Bibilia i roto i to ratou oraraa. E tauturu te hiˈopoaraa o na buka i te feia apî i roto i te parau mau ia “aahia” i roto i te Mesia e ‘ia papu i te parau faaroo.’ (Kol. 2:6, 7) E faufaa-atoa-hia anei ta tatou mau tamarii i te reira? E mea faufaa ia haapiihia ratou no nia i te hoo, te Basileia e te huru o te feia pohe. E hinaaro atoa te mau tamarii e ite no te aha te Atua e vaiiho noa ˈi i te ino e e papu e te ora nei tatou i te mau mahana hopea o teie nei ao. E mea faufaa ia papu ia ratou e tei i te mau Ite no Iehova te parau mau. E hinaaro atoa te feia apî e taa i te mau faaueraa tumu Bibilia e e nafea ia faaohipa i to ratou feruriraa. (Heb. 5:14) Parau mau, e haapao iho â te mau metua i te matahiti o ta ratou mau tamarii e eaha ta ratou e taa. E mea rahi râ te tamarii e nehenehe e haapii i te pue parau mau hohonu o te Bibilia noa ˈtu e e mea apî ratou.—Luka 2:42, 46, 47.