A pee i te hiˈoraa o te mau peropheta: Mika
1. Ua feruriruri paha te peropheta Mika i teihea uiraa e no te aha e ere ai ta ˈna pororaa i te mea faufaa ore?
1 ‘Afea te hopea o teie ao ino e tae mai ai?’ Ua feruriruri paha te peropheta Mika i tera uiraa a faaite ai oia i ta Iehova mau poroi haavaraa i na basileia o Iseraela e o Iuda. Ua tiaturi te peropheta e tupu iho â te reira. E ere ta ˈna pororaa i te mea faufaa ore no te mea i 740 hou te Mesia, a ora noa ˈi Mika, ua tupu ta Iehova mau parau i nia ia Samaria. (Mika 1:6, 7) I muri aˈe, ua haamouhia Ierusalema i 607 hou te Mesia. (Mika 3:12) E nafea ia pee i to Mika hiˈoraa a tiai noa ˈi ia tupu te haavaraa a Iehova i to tatou tau?
2. E nafea e no te aha e faaoromai ai a tiai ai i te mahana o Iehova?
2 A faaoromai: Ua papai Mika: ‘E hiˈo vau ia Iehova; e tiai au i te Atua o to ˈu nei ora.’ (Mika 7:7) Aita oia i faaea noa a tiai ai ia tae mai te hopea. Ua ohipa noa râ Mika ei peropheta. Hoê â huru no tatou, e mea tia atoa ia faaite “i te haapao maitai e te paieti” a tiai ai i te mahana o Iehova. (Pet. 2, 3:11, 12) Maoti to Iehova faaoromai, e taime ïa to te taata no te tatarahapa. (Pet. 2, 3:9) No reira, e haafaufaa anaˈe i ta Iehova faaueraa e faaoromai mai te mau peropheta.—Iak. 5:10.
3. No te aha e mea tia ia pure ia Iehova ia horoa mai i to ˈna varua moˈa?
3 A tiaturi i te puai o Iehova: E hopoia fifi mau tei horoahia ia Mika, ua ani râ oia ia Iehova i te puai no te rave maitai i te reira. (Mika 3:8) E ere i te mea maere ia faaue mai te Bibilia ia ani i te puai o Iehova. E horoa iho â oia i te reira i tei rohirohi ia nehenehe ratou e amo i ta ratou hopoia Kerisetiano. (Sal. 84:5, 7; Isa. 40:28-31) Ua ite anei oe i ta Iehova tauturu i roto i ta oe taviniraa moˈa? E pinepine anei oe i te pure ia ˈna ia horoa mai i to ˈna varua moˈa?—Luka 11:13.
4. Eaha te hiˈoraa maitai roa ta Mika i vaiiho mai no tatou?
4 I te roaraa o to ˈna oraraa, i faaite na Mika e o te raveraa o te hinaaro o te Atua te mea faufaa roa ˈˈe no ˈna. Ua faaoti papu oia e faaea taiva ore noa ˈtu te rahi o te viivii morare. E tamata-atoa-hia to tatou taiva ore i te mau mahana atoa. A haapaari ïa i to tatou faaotiraa papu e haere ma te iˈoa o Iehova, to tatou Atua, e a muri noa ˈtu.—Mika 4:5.