A pee i te hiˈoraa o te mau peropheta: Amosa
1. No te aha tatou e itoitohia ˈi i te hiˈoraa o Amosa?
1 “Eita taˈu e nehenehe e poro. I paari na vau i roto i te hoê utuafare veve e aita vau i haere maoro i te haapiiraa.” Mai tera atoa anei to oe manaˈo? Mai te peu e e, e itoitohia oe i te hiˈoraa o Amosa. Noa ˈtu e e taata faaamu mamoe e rave ohipa i roto i te faaapu oia, ua horoa ˈtu Iehova i te puai no te faaite i te tahi poroi faufaa. (Am. 1:1; 7:14, 15) I teie mahana, te faaohipa atoa ra Iehova i te feia riirii aore ra haehaa. (Kor. 1, 1:27-29) Eaha ˈtu â te haapii mai i te hiˈoraa o te peropheta Amosa no te poro?
2. No te aha e poro ai ma te itoito noa ˈtu te patoiraa?
2 Mea itoito noa ˈtu te patoiraa: Ei tahuˈa i te basileia apatoerau o na opu hoê ahuru o Iseraela, i haamori na Amazia i te kafa. A faaroo ai i ta Amosa i tohu, e au e, ua na ô oia: ‘A hoˈi i ǒ oe! E haapaoraa iho â ta matou!’ (Am. 7:12, 13) Ua taviri Amazia i ta te peropheta mau parau ia tapea te arii Ieroboama i ta ˈna ohipa. (Am. 7:7-11) Ua mǎtaˈu anei Amosa? Aita roa ˈtu. I teie mahana, e na reira atoa vetahi tia haapaoraa ia turu te feia poritita i ta ratou mau hamani-ino-raa i te nunaa o Iehova. Te haapapu maira râ te Atua e eita hoê aˈe patoiraa e manuïa.—Isa. 54:17.
3. Eaha na poroi e piti ta tatou e faaara?
3 A faaite i ta te Atua haavaraa e haamaitairaa no a muri aˈe: Noa ˈtu e ua tohu Amosa i te haavaraa i na opu hoê ahuru o Iseraela, ua faaoti oia i ta ˈna buka ma te faaite e e haamaitai e e haamau faahou Iehova i te haamoriraa mau. (Am. 9:13-15) Te faaara atoa ra tatou i te “mahana haavaraa” a te Atua. E tuhaa noa râ te reira o te “evanelia o te basileia.” (Pet. 2, 3:7; Mat. 24:14) E tia atoa hoi e faaite e e haamou Iehova i te feia iino i Aramagedo no te faariro i te fenua ei paradaiso.—Sal. 37:34.
4. Eaha te papu ia rave tatou i to Iehova hinaaro?
4 E rave rahi taata patoi i roto i teie nei ao. E ere iho â ïa i te mea ohie i te haapao i ta tatou pûpûraa ia Iehova a faatupu atoa ˈi i to ˈna hinaaro. (Ioa. 15:19) Noa ˈtu râ, e tamau iho â Iehova i te tauturu mai ia rave i to ˈna hinaaro mai ta ˈna i na reira no Amosa.—Kor. 2, 3:5.