A haamaitai atu â ia Iehova
1. Eaha te faanahoraa e tauturu mai ia haamaitai rahi roa ia Iehova?
1 I Mati aˈenei, ua ravehia te tahi faanahoraa ia riro te taata poro ei pionie tauturu ma te poro e 30 hora i te mau avaˈe Mati e Eperera atoa e tae noa ˈtu i te avaˈe e tere mai ai te tiaau haaati. Ua tano anaˈe to ˈna tere i nia e piti avaˈe, e maitihia ïa hoê o na avaˈe no te poro e 30 hora ei pionie tauturu. E nehenehe tei rave i tera taviniraa e apiti i te taatoaraa o te putuputuraa no te mau pionie tamau e taa ê. Aita anaˈe e tia ia poro e 50 hora, e “haamaitai rahi roa [tatou] . . . ia Iehova” ma te riro ei pionie tauturu e maha taime i te matahiti ma te poro e 30 hora!—Sal. 109:30; 119:171.
2. Eaha ta te mau pionie tauturu e fanaˈo a tere mai ai te tiaau haaati?
2 A tere mai ai te tiaau haaati: I teie nei, e rave rahi atu â te riro ei pionie tauturu e te fanaˈo i te faaitoitoraa a poro ai e te tiaau haaati. (Roma 1:11, 12) E ani te mau pionie tauturu e rave ra i te ohipa ia poro e o ˈna i te Mahana maa e Tapati. Mea rahi te rave i te tahi mahana faaearaa ohipa no te na reira. Hau atu â, e itoito-roa-hia te mau pionie tauturu ia haere atu i te putuputuraa no te mau pionie tamau e taa ê!
3. No te aha e taime maitai roa ˈi te tau o te Oroa haamanaˈoraa no te riro ei pionie tauturu?
3 I Mati e Eperera: A poro ai e 30 hora, e tataipiti te tusia haamaitairaa a te mau pionie tauturu i te tau e faatupuhia ˈi te Oroa haamanaˈoraa! (Heb. 13:15) E avaˈe maitai roa Mati e Eperera no te poro atu â ei pionie tauturu. I te mau matahiti atoa, i taua mau avaˈe ra, e oaoa tatou i te opere i te mau titau-manihini-raa. I te mea e e rave rahi te tae mai i te pororaa, e ohipa ïa tatou e te taata poro e rave rau. I muri aˈe i te Oroa haamanaˈoraa, e hoˈi tatou e farerei i tei tae mai ia haere atoa mai ratou e faaroo i te oreroraa parau taa ê. Eita anei to aau e hinaaro e haafaufaa i tera mau taime no te riro ei pionie tauturu?—Luka 6:45.