No teihea tumu tatou e poro ai?
1. A poro ai, o vai ta tatou e here ra?
1 I teie mahana, o te pororaa i te parau apî maitai o te Basileia o te Atua te ohipa faufaa roa ˈˈe. Ma te poro e haapao ai tatou i na faaueraa rahi roa ˈˈe e piti, e here ia Iehova e i to tatou taata-tupu. (Mar. 12:29-31) Na te here e turai ia tatou ia riro ei tavini itoito.—Ioa. 1, 5:3.
2. I roto i te pororaa, e nafea ia faaite e te here ra tatou ia Iehova ?
2 Te here ia Iehova: O te here ia Iehova, to tatou Hoa rahi roa ˈˈe, te tumu tatou e poro ai. Fatata e 6 000 matahiti to Satani pari-haavare-noa-raa ˈtu. (Kor. 2, 4:3, 4) Te tiaturi nei ïa vetahi e te haamauiui ra te Atua i te feia hara i roto i te po auahi, e Toru tahi o ˈna e aita e tâuˈa ra i te taata. E rave rahi e faaoti nei e aita e Atua. E faaite iho â ïa tatou i te taata i te parau mau no nia i to tatou Metua i te raˈi! Te faaoaoa nei ta tatou mau tutavaraa e poro ia Iehova, area o Satani te riri noa ra ïa.—Mas. 27:11; Heb. 13:15, 16.
3. Te faaite ra te pororaa e te here ra tatou i te taata-tupu, e nafea?
3 Te here i te taata-tupu: I te taime atoa tatou e poro ai e faaite ai tatou i te here i te taata. I teie tau fifi, e hinaarohia iho â e faaroo i te parau apî maitai. Mai to Nineve i te tau o Iona e rave rahi tei ore i “ite i to ratou rima atau e to ratou rima aui.” (Iona 4:11) Maoti ta tatou pororaa e ite ai te taata e nafea ia fanaˈo i te hoê oraraa oaoa a noaa ˈtu ai te tiaturiraa. (Isa. 48:17-19; Roma 15:4) Ia faaroo e ia haa ratou ia au i tei haapiihia, “e hope roa ïa i te ora.”—Roma 10:13, 14.
4. Eaha ta Iehova e ore roa e haamoe?
4 Eita te tamarii maitai e here i to ratou metua i te tahi noa mahana, i te mau taime atoa râ. E na reira atoa anaˈe no te Atua. I te mea e te here atoa ra tatou i te taata, e ore tatou e poro noa i te taime i faataahia, i te mau mahana atoa râ. E tamau anaˈe ïa i te na reira. (Ohi. 5:42) Eita roa Iehova e haamoe i tera here.—Heb. 6:10.