Rata a te Tino aratai

E au mau taeae e tuahine e:

O to tatou Metua i te raˈi ra o Iehova te hiˈoraa maitai roa ˈˈe o te here. Ia au i te Bibilia: “E aroha hoi te Atua.” (Ioa. 1, 4:8) Noa ˈtu e o Iehova te Atua Mana hope, aita te Bibilia e parau ra e “e puai te Atua.” Te niu ra o ˈna i ta ˈna faatereraa i nia iho â râ i te here. E hinaaro mau â tatou e haafatata ˈtu ia ˈna, e ere anei?

Auaˈe, aita Iehova e faahepo ra ia tatou ia tavini ia ˈna. E ere o ˈna i te faatere haavî. Te hinaaro nei o ˈna ia tavini tatou ia ˈna ma te here. A na reira ˈi, te faaite nei tatou i to tatou hinaaro i ta ˈna faatereraa. E faatere mai hoi o ˈna ma te tia e te here. Tei itehia ïa mai te omuaraa mai iho â.

Aita Iehova i faahepo ia Adamu e Eva ia auraro ia ˈna. Ua hinaaro râ o ˈna e na raua iho â e maiti. Ahani e ua here mau raua ia Iehova e ua haafaufaa i ta ˈna i rave no raua, e patoi raua i te mau tutavaraa a Satani e orure hau ai raua.

I muri aˈe, teie te mau parau hopea a Mose i te nunaa Iseraela: “Inaha, ua tuu vau i te ora e te maitai, i te pohe e te ino, i mua ia oe i teie nei mahana.” (Deut. 30:15) Na te nunaa iho â e maiti e nafea ratou ia ora. Ua parau atoa Iosua i to Iseraela: “E e mea ino ia outou ia haamori ia Iehova, e faataa na outou i teie nei mahana i ta outou e haamori.” Pahono atura ratou: “Eiaha roa ïa parau ia matou i te faarue ia Iehova.” (Ios. 24:15, 16) Hoê â no tatou i teie mahana. No to tatou here ia Iehova, eita roa ˈtu tatou e faarue ia ˈna.

Ei Kerisetiano, ua ite tatou eaha te tiamâraa e maiti. E horoa te mau matahiapo i te aˈoraa. Eita râ ratou e faatere i te oraraa aore ra i te faaroo o vetahi ê. Ua papai Paulo: “E ere . . . mai te mea e o matou te fatu o to outou faaroo, ei tauturu râ matou i to outou oaoa; e mau faaroo hoi to outou.”—Kor. 2, 1:24.

Mea oaoa ia rave i te tahi mea ia hinaaro tatou e na reira, eiaha râ ia faahepohia mai! Te ani maira Iehova ia rave i te mea maitai ma te here. Ia au i ta Paulo mau parau, mea faufaa te reira: “Ia horoa noâ vau i ta ˈu mau taoˈa atoa ei faaamu i te taata rii, e ia tuu noa ˈtu vau i tau tino ia tahuhia i te auahi, e aita o ˈu aroha, aita roa a ˈu e faufaa i reira.”—Kor. 1, 13:3.

Auê Iehova i te oaoa i te ite e mirioni o to tatou mau taeae e tuahine ia tavini ia ˈna ma to ratou aau atoa!

Te here nei ïa Iehova i te taatoaraa o ta ˈna mau tavini. Ia outou atoa e te mau tamarii e taurearea e here ra ia Iehova, eiaha râ i teie nei ao e ta ˈna e pûpû maira. Ia papu atoa ia outou e te here ra matou ia outou.—Luka 12:42, 43.

No to outou here ia Iehova, ua poro outou, taeae, tuahine e feia apî e 1 748 697 447 hora. No te here, e 7 782 346 tei apiti i te taviniraa na te ao. Te oaoa nei matou i te ite e 268 777 taata, mea rahi feia apî i roto, tei bapetizohia ei taipe o to ratou pûpûraa ia Iehova. I nia i te hoê faito au noa, e 5 168 taata ïa tei bapetizohia i te hebedoma taitahi. Te putapû nei to matou aau!

I teie tau hopea, e faaruru te nunaa o te Atua e rave rahi fifi, tautooraa, hamani-ino-raa, maˈi. Oia atoa te matahiti rahi. Ua faaoti râ tatou eiaha e “orai tia i muri” aore ra e “taiâ.” Te here nei matou ia outou paatoa.—Heb. 10:39; Kor. 2, 4:16.

To outou mau taeae,

Tino aratai a te mau Ite no Iehova