Eiaha e taiâ—ma te manaˈo eita e maraa ia oe
1. No te aha vetahi e taiâ ˈi i te pûpû i te haapiiraa Bibilia?
1 Te taiâ ra anei oe i te pûpû i te haapiiraa Bibilia no to oe manaˈo eita e maraa ia oe ia faatere maitai i te hoê? O Mose e Ieremia te tahi mau tavini taiva ore i tahito tei manaˈo atoa mai tera. (Exo. 3:10, 11; 4:10; Ier. 1:4-6) E huru matauhia ïa te reira. E nafea ia faaruru i teie huru manaˈo?
2. No te aha eiaha ˈi e taotia i ta tatou taviniraa i te poro-noa-raa i tera e tera fare ma te vaiiho e na vetahi e faatere i te mau haapiiraa Bibilia?
2 Ia haamanaˈo ïa tatou e eita roa ˈtu Iehova e titau mai i te hoê mea e ore e maraa ia tatou. (Sal. 103:14) No reira, e nehenehe iho â tatou e rave i tei faauehia mai, e ‘faariro i te taata ei pǐpǐ’ e e ‘haapii atu ia ratou.’ (Mat. 28:19, 20) Aita Iehova i horoa noa i tera hopoia i te feia aravihi roa ˈˈe. (Kor. 1, 1:26, 27) Eiaha ïa tatou e taotia i ta tatou taviniraa i te poro-noa-raa i tera e tera fare e e vaiiho e na vetahi e faatere i te mau haapiiraa Bibilia.
3. E nafea Iehova ia faaaravihi ia tatou no te faatere i te haapiiraa Bibilia?
3 Na Iehova e faaaravihi ra ia tatou: Maoti Iehova i nehenehe ai tatou e faariro i te taata ei pǐpǐ. (Kor. 2, 3:5) Maoti ta ˈna faanahonahoraa, te haapii nei oia ia tatou i te pue parau mau Bibilia ta te taata ite roa ˈˈe i teie nei ao e ore hoi e taa. (Kor. 1, 2:7, 8) Ua faaherehere oia i te faatiaraa o te mau ravea haapiiraa a te Orometua rahi o Iesu no te tauturu ia tatou. Te faaineine atoa nei oia ia tatou maoti te amuiraa. Hau atu â, ua horoa mai Iehova i te mau mauhaa no te haapii i te Bibilia, mai te buka Bibilia haapii o te faataa ra i te parau mau ma te tano e te ohie ia taa. Faatere i te hoê haapiiraa Bibilia, e mea ohie aˈe ïa i ta tatou i manaˈo na!
4. No te aha e tiaturi ai e tauturu mai iho â Iehova ia tatou?
4 Ma te tauturu a Iehova, ua nehenehe Mose e Ieremia e amo i ta raua hopoia. (Exo. 4:11, 12; Ier. 1:7, 8) E ani anaˈe ïa i te tauturu atoa a Iehova. Ia faatere tatou i te hoê haapiiraa Bibilia, te haapii ra tatou i te taata i te parau mau no nia ia Iehova. Mea au hoi te reira i te aro o te Atua. (Ioa. 1, 3:22) E tutava anaˈe ïa i te faatere i te haapiiraa Bibilia, te tahi tuhaa oaoa e hoona roa ˈˈe o ta tatou taviniraa.