A ite i te maitai o ta outou ohipa
1. Eaha te tumu e iti ai to tatou itoito no te taviniraa?
1 Ua poietehia te taata ia ite oia i te maitai o ta ˈna mau ohipa. (Koh. 2:24) Ia ore râ tatou e ite i te maitai o ta tatou ohipa, aore ra taviniraa, e nehenehe te toaruaru e faaere ia tatou i te oaoa e e faaiti i to tatou itoito. Eaha ïa te tauturu mai ia tapea i te manaˈo maitai?
2. Ia tano noa ta tatou mau tiairaa, no te aha?
2 Ia tano noa ta tatou mau tiairaa: A haamanaˈo e, noa ˈtu e mea iti te taata i faaroo ia Iesu, ua manuïa iho â ta ˈna taviniraa. (Ioa. 17:4) I roto i ta ˈna parabole o te ueue huero, ua tohu Iesu e eita te rahiraa e farii i te poroi o te Basileia e au i te huero. (Mat. 13:3-8, 18-22) Noa ˈtu râ, ua tutava noa iho â tatou.
3. E nafea tatou e hotu atu â ˈi noa ˈtu eita te rahiraa e farii i te poroi?
3 E nafea tatou e hotu atu â ˈi? Ia au i ta Iesu parabole, e “hotu” te feia e farii i te poroi. (Mat. 13:23) Ia oteo e ia paari te sitona, e itehia te huero apî eiaha râ te ohi sitona rii. Oia atoa, e hotu atu â te mau Kerisetiano ia ueue rahi ratou i te huero o te Basileia na roto i te pororaa, eiaha râ ma te faariro noa i te taata ei pǐpǐ. Ia na reira tatou, e rahi roa ˈtu â te “maitai” e e oaoa tatou ia farii mai te taata aore ra aita. Te faaraa ra tatou i te iˈoa o Iehova. (Isa. 43:10-12; Mat. 6:9) Te oaoa nei tatou i te riroraa ei hoa rave ohipa no te Atua. (Kor. 1, 3:9) O tera ‘tusia a te vaha’ ta Iehova e au.—Heb. 13:15, 16.
4. Eaha te maitai ite-ore-hia e nehenehe e tupu i roto i ta tatou taviniraa?
4 Eita paha tatou e ite i te maitai o ta tatou ohipa. Mea papu e i faaroo atoa na vetahi i ta Iesu pororaa e ua riro maira ei pǐpǐ na ˈna i muri iho roa, a oti ai ta ˈna taviniraa i te fenua nei. Mai tera atoa no te huero o te Basileia i ueuehia, e nehenehe paha te reira e aˈa e e tupu i roto i te aau o te taata i muri iho roa, e eita tatou e ite ia haere mai o ˈna i te parau mau. E faatupu iho â ta tatou taviniraa i te maitai rahi! No reira, ia rahi â to tatou hotu e e haapapu anaˈe e e pǐpǐ iho â tatou na Iesu.—Ioa. 15:8.