Pahonoraa i ta outou mau uiraa
◼ Ia feruri tatou i te aha a hinaaro ai tatou ia fatu te faanahonahoraa a Iehova i te tahi tuhaa aore ra i te taatoaraa o ta tatou faufaa ia pohe tatou?
Ia pohe te taata, aita ta ratou e tufaa faahou i nia i ta ratou mau faufaa. (Koh. 9:5, 6) E haapapai e rave rahi i te hoê parau mana, aore ra parau tutuu, o te faataa i to ratou hinaaro no te tufaraa i ta ratou mau faufaa. (Arii 2, 20:1) I te rahiraa o te taime e faaite atoa te reira i te iˈoa o te taata i maitihia ei tiaau no ratou aore ra ei mono ia ratou no te faatupu i ta ratou mau faaotiraa. Aita anaˈe e parau mana i faaineinehia, na te ture ïa e faaoti e nafea ia opere i te faufaa a te taata i pohe. Mai te peu e e hinaaro taa maitai to tatou, ei hiˈoraa ia fatu te faanahonahoraa a Iehova i te tahi tuhaa aore ra i te taatoaraa, mea faufaa te hoê parau mana no te haapapu i te reira e te hoê taata maiti-maitai-hia no te tia ˈtu aore ra no te mono ia tatou.
E hopoia rahi ta te tiaau aore ra mono. Ia au i te rahi o te faufaa, e nehenehe paha e pau rahi te taime ia haaputuputu e i muri aˈe ia opere i te reira. Hau atu â, e titau pinepine te feia mana toroa ia pee i te mau faatureraa e vai ra. E ere iho â pauroa o te mau melo o te amuiraa te riro ei tiaau aore ra ei mono maitai. E maiti ïa tatou i te hoê taata ta tatou i papu e mea aravihi, tiaturihia, e tei ineine iho â i te pee i to tatou hinaaro.—A hiˈo i te tumu parau “Préparer sa succession: une mesure sage” i roto i te Réveillez-vous! o te 8 no Titema 1998 i te api 24-27.
Ia anihia mai oe ia riro ei tiaau aore ra ei mono: A feruri maitai e a faaoti na roto i te pure e maraa anei ia oe te hopoia. (Luka 14:28-32) I muri aˈe i te poheraa o te taata, e titauhia ia faaara oe i te feia atoa e fanaˈo i tera faufaa. A faatiahia ˈi oe ia na reira, e tufa oe i te faufaa ia au i te ture e ia au i tei faaoti-papu-hia i roto i te parau tutuu. Mea iti anei aore ra mea rahi te faufaa, e ara maitai te hoê tiaau aore ra mono eiaha te parau tutuu ia haafaufaa-ore-hia. Te mau ô atoa i horoahia ˈtu i te hoê taatiraa e au i te ture e faaohipahia ra e te mau Ite no Iehova, e ô ïa i pûpûhia na Iehova e ta ˈna faanahonahoraa.—Luka 16:10; 21:1-4.