Rata a te Tino aratai

E te mau hoa Kerisetiano here e,

Te oaoa nei matou i te papai atu ia outou, te mau tavini taiva ore a Iehova, tei hau atu i te hitu mirioni i teie nei. Ia farerei outou i te hoê hoa Kerisetiano no te tahi atu fenua, e tupu vave iho â te hoê taairaa here taa ê e o ˈna. (Ioa. 13:34, 35) Mea papu e ia taio outou i roto i teie Annuaire i te mau faatiaraa anaanatae o te faaroo e te taiva ore o to outou mau taeae e tuahine no te mau fenua rau, e tupu mai â tera here.

Ia au i te mau rata e faatiaraa i tae mai na te ao nei, te haapao maite nei te rahiraa o outou i ta outou porotarama haamoriraa utuafare. Te faaohipa aravihi ra vetahi i te mau ravea rau no te faaanaanatae e huti i te ara-maite-raa o ta ratou mau tamarii. (Eph. 6:4) I te haapii-amui-raa na hoa faaipoipo i te Bibilia, ua puai roa ˈtu â to raua mau taairaa. (Eph. 5:28-33) Maoti tera mau taime haapii-hohonu-raa i te Parau a te Atua i faufaahia ˈi te taata taitahi e te mau utuafare atoa.—Ios. 1:8, 9.

Te manaˈonaˈo nei matou ia outou, te feia tei tairihia e te mau ati natura i tupu aˈenei. Te hinaaro atoa nei matou e haamauruuru ia outou, te mau rima tauturu tei ohipa ma te haamarirau ore i taua mau taime ati ra. (Ohi. 11:28-30; Gal. 6:9, 10) Hau atu â, i roto i te amuiraa taitahi, te vai atoa ra outou, tei taa i te mau hinaaro o to tatou mau taeae e o tei ru no te tauturu atu. Mai ia Doreka i tahito, ‘ua rahi ta outou ohipa maitai i rave e te horoa i te taoˈa.’ (Ohi. 9:36) Ia papu ia outou e te ite maira Iehova i te reira e e haamaitai mai iho â oia ia outou.—Mat. 6:3, 4.

I te tahi mau fenua, te taataahihia ra to outou mau tiaraa, te faaohipa hape nei vetahi i te ture no te hamani ino atu. (Sal. 94:20-22) Ma te ite i ta Iesu i tohu no nia i te hamani-ino-raa, te faaoromai nei outou ma te itoito e te faariro nei ia Iehova ei haapuraa. (Ioa. 15:19, 20) Ia papu ia outou e te pure noa nei matou no outou a tamau ai outou i te ‘parau atu i te taata atoa ia ui mai i te tiaturi i roto ia outou.’—Pet. 1, 3:13-15.

Te haapopou nei matou i te mau mirioni o outou e vai mâ noa nei i te pae morare i tera e tera matahiti noa ˈtu te mau tutavaraa tuutuu ore a Satani ia viivii outou. A ite ai outou e te ino noa ˈtu ra te mau ture aveia a te ao, te ‘itoito ra outou i te Fatu e i to ˈna ra puai rahi.’ (Eph. 6:10) Ua ahu mai outou i te haana tamaˈi a te Atua e te patoi nei outou i te mau ravea paari a te Diabolo. (Eph. 6:11, 12) A haamanaˈo e e faaohipa Iehova i to outou hiˈoraa no te pahono papu ia Satani, te faahema!—Mas. 27:11.

Ua oaoa matou i te iteraa e, i 2011, 19 374 737 tei tae mai i te Oroa haamanaˈoraa i te pohe o to tatou Fatu. Ua tae rahi mai te taata no to outou pahonoraa i te aniraa e riro ei pione tauturu i Eperera aˈenei. E mironi taata tei faaroo mau â i te arueraa ma te reo hoê a te mau Ite taiva ore a Iehova! (Roma 10:18) Mai te peu e tei roto oe i tera 2 657 377 pionie tauturu i tera avaˈe aore ra ua tutava oe ia rahi atu â ta oe taviniraa, ua faaoaoa outou paatoa ia matou i to outou aau tae e itoito rahi no te ohipa.—Sal. 110:3; Kol. 3:23.

E 263 131 tei bapetizohia i te matahiti i mairi. Te haamauruuru nei matou ia Iehova e ia outou atoa tei apiti mai no te faatae i teie titau-manihini-raa: “E haere mai. E o tei faaroo ra, a parau atoa oia e, E haere mai. E o tei poihâ ra, a haere mai. E tei hinaaro ra, a rave noa mai oia i te pape ora.” (Apo. 22:17) I muri aˈe i to tatou hiˈopoaraa i te mau tuhaa o te Basileia i haamauhia e Iehova i ta tatou tairururaa mataeinaa 2011, e hinaaro iho â tatou e parau, ‘Ia tae mai to te Atua Basileia!’ Ma te faaitoitohia e te mau parau a Iesu, “E tae vave mau atu â vau,” e apiti atoa ïa tatou ma te aau tae i ta te aposetolo Ioane i pahono: “Amene. Oia ïa, a haere mai, e te Fatu, e Iesu e!”—Apo. 22:20.

A tiai noa ˈi outou i tera tupuraa oaoa, ia papu ia outou to matou here, e te mau taeae e tuahine e, outou e faaite nei i to outou here no Iehova ma te ohipa e te parau mau!—Ioa. 1, 3:18.

To outou mau taeae,

Tino aratai a te mau Ite no Iehova