Toru ravea ia aravihi atu â i te haapiiraa
1. No te aha tatou e imi ai ia aravihi atu â i te haapiiraa?
1 E orometua haapii te feia poro atoa. E haapii tatou i te taata i te aparauraa matamua, te hoˈiraa e farerei i tei anaanatae mai, aore ra ia faatere i te hoê haapiiraa Bibilia. Mea taa ê râ ta tatou e haapii ra. E faataa tatou i ‘te mau papai moˈa’ e nehenehe ai te taata e ‘paari no te ora.’ (Tim. 2, 3:15) E fanaˈoraa taa ê faahiahia ta tatou! E ite mai tatou e toru ravea ia aravihi atu â i te haapiiraa.
2. E nafea ia haapii ma te ohie?
2 Ma te ohie: Ua ite maitai anaˈe tatou i te hoê tumu parau, mea ohie ia haamoe e mea fifi paha no te hoê taata ia taa i te tahi faataaraa. No reira, ia faatere tatou i te hoê haapiiraa Bibilia, eiaha e horoa rahi i te mau parau rii faufaa ore ia haamahitihitihia râ te mau manaˈo faufaa. Aita e titauhia ra ia paraparau rahi tatou no te haapii maitai atu. (Mas. 10:19) E pinepine e mea maitai aˈe ia taio noa i te mau irava faufaa. Ia oti te taioraa i te hoê irava, a tauaparau noa i nia i te tuhaa o te irava e tuati ra i te tumu parau e hiˈopoahia ra. E pue parau mau hohonu to roto i te Aˈoraa i nia i te mouˈa o te Mataio pene 5-7. Ua haapii râ Iesu i te reira ma te ohie e te mau parau maiti-maitai-hia.
3. Eaha te faufaaraa o te mau faahohoˈaraa, e teihea te mea maitai aˈe?
3 Faahohoˈaraa: E tauturu te mau faahohoˈaraa ia haaferuri, ia haaputapû i te aau, e ia haamanaˈo. Eiaha e manaˈo e ia riro oe ei taata faatia aamu no te horoa i te mau faahohoˈaraa maitai. Ua faaohipa pinepine Iesu i te mau faahohoˈaraa poto e te ohie. (Mat. 7:3-5; 18:2-4) E nehenehe noa te tahi hohoˈa hamanihia i nia i te hoê api parau e tauturu atu. Ma te feruriruri na mua, e nehenehe oe e faaohipa maitai i te mau faahohoˈaraa.
4. E nafea e faaohipa maitai ai i te mau uiraa?
4 Uiraa: E turai te mau uiraa i ta oe piahi ia feruri. No reira, a faaoromai ia tuu atu oe i te hoê uiraa. Mai te peu e e pahono oioi atu oe, eita oe e ite mau i ta ta oe piahi e taa ra. Ia hape ta ˈna pahonoraa, mea maitai aˈe ia faaohipa i te tahi atu mau uiraa no te tauturu ia ˈna ia ite i te pahonoraa tano i te faatitiaifaro-noa-raa i ta ˈna mau parau. (Mat. 17:24-27) Aita hoê aˈe orometua haapii tia roa i rotopu ia tatou. No reira, ia fanaˈo tatou e te feia e faaroo mai i te mau maitai mure ore, te faaitoito maira te Bibilia ia ara i ta tatou haapiiraa.—Tim. 1, 4:16.