Les merveilles de la création révèlent la gloire de Dieu
Mea au na e rave rahi e mataitai i te mau mea i poietehia. Aita râ te tahi e taa ra e te faaite ra te poieteraa i te manaˈo e huru aau o to tatou Atua Poiete rahi. (Roma 1:20) E mea maoro aˈenei to Davida iteraa o vai o Iehova na roto i ta ˈNa Parau faaurua. Ua “hiˈo” atoa râ oia e ua haafatata ˈtu ia ˈNa na roto i ta ˈna mau mea i poiete. (Sal. 8:3, 4) E tauturu mai te DVD Les merveilles de la création révèlent la gloire de Dieu ia tatou, ta tatou mau tamarii, e ta tatou mau piahi ia hiˈo maitai i te tahi mau mea ta Iehova i poiete, ia ite i te mau huru maitatai e te ihotaata o to tatou Atua Poiete rahi, e i te pae hopea ia haafatata ˈtu tatou ia ˈna. A mataitai i te DVD e a pahono i te mau uiraa i muri nei.
(1) E nafea te aano e te naho o te ao nui e faarahi ai i to tatou mauruuru ia Iehova? (Isa. 40:26) (2) Ia hiˈo maitai tatou i te pape, eaha ta tatou e haapii mai no nia i Tei hamani i te reira? (Apo. 14:7) (3) E nafea te rahi o te fenua e te piriraa mai o te mahana e faaite ai i te paari o Iehova? (4) No te aha i hamanihia ˈi te avaˈe? (Sal. 89:37) (5) Mea nafea to Iehova poieteraa i te taata ia oaoa ratou i te oraraa? (6) Eaha te ADN? (Sal. 139:16) (7) Eaha te taa-ê-raa i rotopu i te taata e te tahi atu mau mea atoa i te fenua nei ta Iehova i poiete? (Gen. 1:26) (8) Eaha ta outou e tiai ru ra i roto i te ao apî?
Uiraa hau: (9) Nohea mai te mau û? (10) E nafea te pape e tae roa ˈi i te nia-roa-raa o te tumu raau noa ˈtu te puai aratoraa? (11) Eaha te ohipa a te pape i roto i to tatou tino? (12) A horoa i te tahi mau hiˈoraa o te au-maite-raa e vai ra i rotopu i te mau mea ora? (13) E nafea te mau mea ora e ite ai i te faufaaraa ia haa amui ratou? (14) Eaha te “angle d’or” e nafea te reira e itehia ˈi i roto i te poieteraa?
“A hiˈo na” i te poieteraa a Iehova: Te faaitoito ra Iesu ia tatou ‘ia hiˈo i te mau manu o te reva’ e ‘ia haamanaˈo i te mau lili o te aua.’ (Mat. 6:26, 28) A na reira ˈi tatou, e rahi atu to tatou faaroo, tiaturi i Tei poiete, e mauruuru no to Iehova paari, puai faaora, e here. Ia ore tatou ia haafariuhia e te mau ohipa a teie nei ao, e rave anaˈe i te taime e e tutava anaˈe i te hiˈopoa i te mau mea maere ta Iehova i poiete a feruriruri atu ai eaha ta te reira e faaite maira no nia i to tatou Atua.—Sal. 19:1.