Te faaineine nei Iehova ia tatou
1. Eaha atoa ta Iehova e rave ia horoa oia i te tahi hopoia i te taata?
1 Ia horoa Iehova i te tahi hopoia i te taata, e tauturu atoa oia ia ratou. Ei hiˈoraa, ua ani Iehova ia Noa ia hamani i te hoê mea ta ˈna i ore aˈenei i rave: te hoê araka. Ua parau atoa râ Oia ia ˈna ia nafea. (Gen. 6:14-16) I to Iehova faaueraa ia Mose tiai mamoe mamahu ia haere i mua i te feia paari o Iseraela e ia Pharao, ua haapapu Oia ia ˈna: “Ei pihai-atoa-iho vau i to vaha, e na ˈu e faaite ia oe i te parau ia parau oe.” (Exo. 4:12) O te pororaa i te evanelia ta tatou hopoia i teie mahana. Te tauturu atoa mai nei Iehova ma te faaineine ia tatou maoti te Haapiiraa no te taviniraa Kerisetiano e te Putuputuraa no te taviniraa. E nafea tatou e faufaahia ˈi i te reira?
2. E nafea e faufaahia ˈi i te Haapiiraa no te taviniraa Kerisetiano?
2 Haapiiraa no te taviniraa Kerisetiano: A taio e a faaineine i te mau papai e hiˈopoahia i te mau putuputuraa atoa. Ia ite oe i te mau piahi ia vauvau mai i ta ratou tumu parau, e aravihi atu â ïa oe i te haapii i te taata. (Mas. 27:17) A afai atoa i ta oe buka École du ministère. A faahiti ai te tiaau no te haapiiraa i tera buka ia oti te tumu parau taitahi, a reni i te mau manaˈo faufaa ta oe e hinaaro e faaohipa aore ra a tapao i te reira i te hiti o te api. Te ravea maitai roa ˈˈe râ ia faufaahia oe, o te apiti-roa-raa ˈtu ïa. Ia horoahia mai ta oe tumu parau, a faaineine maitai i te reira e a faaohipa i te mau aˈoraa ta oe e fanaˈo. A poro ai oe, a faaohipa i ta oe i haapii.
3. E nafea e faufaahia ˈi i te Putuputuraa no te taviniraa?
3 Putuputuraa no te taviniraa: I te fare, e taio anaˈe i te mau manaˈo tauturu e hiˈopoahia i tera putuputuraa a faaineine atu ai i te mau pahonoraa poto. Mea rahi ïa te nehenehe e pahono. A hiˈo maitai i te mau faahiˈoraa e a tapao i te mau manaˈo tauturu atoa e manuïa ˈtu â ˈi ta oe pororaa. A tapea ia oe ra te mau tumu parau o Ta tatou taviniraa i te Basileia o te tauturu ia oe i roto i te pororaa.
4. Ia faaohipa maitai tatou i te faaineineraa no ǒ mai ia Iehova, no te aha?
4 E tautooraa te hopoia horoahia ia Mose e Noa. Oia atoa te pororaa i te evanelia na te ao atoa nei. (Mat. 24:14) E maraa ia tatou ia turui tatou i nia ia Iehova, to tatou Orometua Rahi roa ˈˈe, e ia faaohipa maitai tatou i ta ˈna i faaineine no tatou.—Isa. 30:20.