Ei “aau mǎrû aroha noa” to tatou
1. Eaha te hinaaro iti rahi o te taata?
1 No te mau huru tupuraa na te ao e ino noa ˈtura, e mirioni taata e peapea ra, e hepohepo ra, e aita e tiaturiraa. Te hinaaro mau nei ratou i te tauturu, i te aumihi. Ei Kerisetiano, e faaite anaˈe ïa i te anaanatae haavare ore i to tatou taata-tupu. (Mat. 22:39; Gal. 6:10) E nafea?
2. Eaha te ravea maitai roa ˈˈe no te faaite i te aumihi?
2 E ohipa aroha: No ǒ noa mai te tamahanahanaraa mau e te vai maoro ia Iehova ra. (Kor. 2, 1:3, 4) Te faaitoito maira oia ia pee i to ˈna hiˈoraa ma te riro ei taata “aau mǎrû aroha noa” e te faaue atoa maira ia faaite i te parau apî maitai o te Basileia i to tatou taata-tupu. (Eph. 4:32) Tera te ravea maitai roa ˈˈe no te tamahanahana i “te feia aau oto.” O te Basileia o te Atua hoi te tiaturiraa hoê roa no te huitaata e mauiui ra. (Isa. 61:1) No to ˈna aumihi rahi i to ˈna nunaa, ua fatata roa Iehova i te faaore i te ino e i te haamau i te hoê ao apî parau-tia.—Pet. 2, 3:13.
3. E nafea ia pee i te huru feruriraa o Iesu?
3 Te huru feruriraa o Iesu: A poro ai i te hoê nahoa, ua haapao Iesu i te taata taitahi tei hinaaro hoi e faatupu i te taairaa piri e o Iehova. E au ratou i te mamoe aita e tiai no te aratai. No to ˈna aumihi, haapii atura Iesu ia ratou. (Mar. 6:34) Ia pee tatou i te huru feruriraa o Iesu, e faaite ïa tatou i te aumihi mau i te taata taitahi. E itehia te reira i nia i ta tatou huru paraparau e to tatou hohoˈa mata. E riro te pororaa ei mea faufaa roa ˈˈe no tatou e e faatano tatou i ta tatou mau parau ia au i te tapitapiraa o te taata taitahi.—Kor. 1, 9:19-23.
4. No te aha e faaite ai i te aumihi?
4 Te pahono maitai ra te hoê nahoa rahi no te mau nunaa atoa i te poroi o te Basileia e i te anaanatae e faaitehia ra. Ia tamau tatou i te faaite i te aumihi, e faaoaoa e e faahanahana tatou ia Iehova, to tatou Atua aroha noa.—Kol. 3:12.