“Eiaha oe e mǎtaˈu”
1. Eaha te mau fifi ta tatou e faaû atoa mai ia Ieremia?
1 I to ˈna riroraa ei peropheta, ua manaˈo Ieremia e eita e maraa ia ˈna. Ua haapapu râ Iehova ia ˈna ma te na ô “eiaha oe e mǎtaˈu,” e ua haapuai ia ˈna no te amo i ta ˈna hopoia. (Ier. 1:6-10) I teie mahana, e ohipa paha te mamahu aore ra te ereraa i te tiaturi i nia i ta tatou taviniraa. Oia atoa te mǎtaˈu i te huru pahonoraa aore ra hiˈoraa o te taata, eita ˈtu ai tatou e poro. E nafea ia tinai i teie mǎtaˈu, e eaha te mau haamaitairaa?
2. E nafea te faaineineraa e tauturu mai ai?
2 Te faaineineraa: Ia iti mai to tatou mǎtaˈu, e faaineine maitai anaˈe ïa. Ei hiˈoraa, ia hiˈo faahou tatou i te mau patoiraa te nehenehe e itehia, e ineine ïa tatou no te pahono atu. (Mas. 15:28) No te aha e ore ai e faaineine no te mau fifi e farereihia ra i te haapiiraa e i roto i te taviniraa i te taime o te arui haamoriraa utuafare?—Pet. 1, 3:15.
3. E nafea te tiaturiraa ia Iehova e tauturu mai ai?
3 A tiaturi ia Iehova: O te tiaturiraa i to tatou Atua te hoê ravea papu no te arai i te mǎtaˈu. Ua haapapu Iehova e e tauturu mai oia. (Isa. 41:10-13) Aita ˈtu parururaa maitai roa ˈˈe, e ere anei? Ua haapapu atoa Iesu e noa ˈtu te mau tupuraa manaˈo-ore-hia, e tauturu mai te varua moˈa o te Atua ia manuïa ta tatou pororaa. (Mar. 13:11) E tiaoro tamau anaˈe ïa ia Iehova ia horoa mai i to ˈna varua moˈa.—Luka 11:13.
4. Eaha te mau haamaitairaa ia tavini ma te tuutuu ore noa ˈtu te mau fifi?
4 Te mau haamaitairaa: Ia tavini tatou ma te tuutuu ore noa ˈtu te mau fifi, e itoitohia tatou ia faaruru i te mau tamataraa i mua nei. E faahotu tatou i te itoito e te mǎtaˈu ore, huru maitatai hoi o te feia tei î i te varua moˈa. (Ohi. 4:31) Hau atu â, ia tinai tatou i to tatou mǎtaˈu maoti te tauturu a Iehova, e puai to tatou faaroo e to tatou tiaturi i to ˈna rima faaora. (Isa. 33:2) E oaoa e e mauruuru atoa tatou i te ite e te faaoaoa ra tatou i to tatou Metua i te raˈi. (Pet. 1, 4:13, 14) E faaite anaˈe ïa i te poroi o te Basileia ma te mǎtaˈu ore, ma te tiaturi noa i ta Iehova tauturu!