Ua navai anei ta ˈu e rave nei?

1. E haapeapea paha te hoê Kerisetiano taiva ore i te aha?

¹ Ua uiui atoa paha oe i teie uiraa. Peneiaˈe ua toaruaru oe no te mea aita oe e apiti rahi faahou ra i te taviniraa no te matahiti rahi anei, te maˈi aore ra te mau hopoia utuafare. Ua papai te hoê tuahine e toru ta ˈna tamarii e i te tahi mau taime e hepohepo oia no te mea te taotia ra te taime e te puai no te haapao i to ˈna utuafare i ta ˈna e nehenehe e rave i roto i te taviniraa. Eaha ïa te tauturu mai ia hiˈo i te mau mea ma te faito noa?

2. Eaha ta Iehova e titau maira?

² Ta Iehova e titau maira: E hinaaro iho â tatou paatoa e tavini hau atu â, e tapao ïa e mea faufaa te reira no tatou. E mea taa ê roa râ ta tatou e hinaaro ra e rave e ta tatou e nehenehe mau e rave. Ia haamanaˈo tatou e ua ite maitai Iehova i to tatou mau taotiaraa e eita oia e titau hau atu i tei maraa ia tatou ia rave. (Sal. 103:13, 14) Eaha ïa ta ˈna e titau maira? Ia tavini taatoa tatou ia ˈna e ia horoa i te mea maitai roa ˈˈe na ˈna.—Kol. 3:23.

3. E nafea ia hiˈopoa i ta tatou e rave ra i roto i te taviniraa?

³ Eaha te tauturu mai ia ite i te mea tano no tatou? E pure anaˈe ia Iehova ia tauturu mai ia hiˈo i ta tatou e rave mau ra. (Sal. 26:2) E ani atoa anaˈe i te tauturu a te hoê hoa Kerisetiano feruriraa paari e te tiaturihia o tei matau maitai ia tatou e o te parau roa mai i tei tia ia haamaitaihia. (Mas. 27:9) A haamanaˈo atoa e i te mea e e taui te mau tupuraa, e mea maitai ia hiˈopoa tamau i to tatou oraraa.—Eph. 5:10.

4. Eaha to tatou manaˈo i te mau haamanaˈoraa Bibilia no nia i te taviniraa?

⁴ Eaha to tatou manaˈo i te mau haamanaˈoraa? I roto i te hoê hororaa, ma te reo puai, e faaitoito noa te feia mataitai i te feia horo. No te aha? No te tauturu ia ratou ia haru i te re e eiaha ia haaparuparu. Oia atoa no te mau faaitoitoraa e haamanaˈoraa Bibilia i ta tatou mau putuputuraa e i roto i ta tatou mau papai ia “onoono maite â” i te poro. (Tim. 2, 4:2) E ere te reira i te auraa e aita e navai ta tatou e rave ra, no to tatou râ maitai. E nehenehe tatou e tiaturi e a rave noa ˈi tatou i te mea maitai roa ˈˈe, e haamanaˈo Iehova i ta tatou ‘ohipa e to tatou hinaaro.’—Heb. 6:10.