Ia ineine noa tatou i te pûpû i te haapiiraa Bibilia
1. Eaha te titauhia no te pee i ta Iesu faaueraa?
1 Ua faaue mai Iesu ia ‘faariro i te taata ei pǐpǐ ma te haapii atu ia ratou.’ (Mat. 28:19, 20) Ia ineine noa ïa tatou i te pûpû i te haapiiraa Bibilia i te mau taime atoa, eiaha noa i te mahana o te hopea hebedoma i faataahia no te reira. Teie te tahi mau manaˈo tauturu.
2. E pûpû i te haapiiraa Bibilia ia vai?
2 A pûpû atu: Rahi atu â tatou i te pûpû i te haapiiraa Bibilia, rahi atu â tatou i te fanaˈo i te hoê. (Koh. 11:6) Ua tamata anei oe i te pûpû roa ˈtu i te reira? O ta te hoê ïa amuiraa i Marite i tutava taa ê i te rave i te hoê avaˈe taatoa. Eaha râ paha ratou i te oaoa i te haamata e 42 haapiiraa Bibilia! Aita te feia anaanatae ta oe e farerei i ite e te hinaaro ra oe e haapii i te Bibilia e o ratou. No reira, no te aha e ore ai e pûpû roa ˈtu ia hoˈi faahou atu oe? Ia ore ratou e farii, eiaha e haapeapea, a atuatu noa i to ratou anaanatae. Ua ani aˈena anei oe i to oe mau taata tapiri, fetii, hoa ohipa, e hoa haapiiraa e e hinaaro anei ratou e haapii i te Bibilia? E nehenehe atoa oe e ani i ta oe mau piahi Bibilia e e hoa aore ra e fetii anei to ratou o te hinaaro e haapii.
3. Eaha te tauturu faufaa ta tatou e fanaˈo ra, e afea e faaohipa ˈi i te reira?
3 Te hoê tauturu faufaa: E tauturu faufaa te api parau E hinaaro anei oe e ite i te parau mau? no te haamata i te mau haapiiraa Bibilia. E horoa ˈtu paha oe i te taata e farii i te tahi papai aore ra eita. E faaohipahia paha te reira i te tuhaa fenua tapihoo, na te mau aroâ, ia haponohia te mau rata, e i te mau farerei-faahou-raa. E nehenehe atoa e vaiiho atu i te mau fare aita e taata. No te aha e ore ai e rave atoa i te reira ia haere oe na nia i te pereoo mataeinaa, e hoohoo haere, e i te ohipa? Te faataa poto ra te api hopea i ta tatou faanahoraa no te hoê haapiiraa Bibilia e te faaite ra i te buka Bibilia haapii.
4. E nafea ia faaohipa i te api parau no te haamata i te hoê haapiiraa?
4 A horoa ˈi oe i te api parau i te taata, a faaite atu i te mau uiraa i te api matamua e a ui atu, “Eaha te uiraa ta oe e anaanatae roa ra?” A hiˈopoa i te pahonoraa e vai ra i roto, e a taio aore ra a haapoto noa i te api hopea o te faataa ra i te faanahoraa no te haapii i te Bibilia. A faaite atu ia ˈna ihea oia e ite ai i te mau haamaramaramaraa hau no nia i ta orua aparauraa i roto i te buka Bibilia haapii. A pûpû atu i te buka e a faanaho no te hoˈi faahou atu e farerei ia ˈna no te aparau â.
5. Ia ineine noa tatou i te pûpû i te haapiiraa Bibilia, no te aha?
5 E taata â to roto i ta tatou tuhaa fenua e hinaaro ra e ite eaha ta te Bibilia e haapii mau ra. Ia ineine noa tatou i te pûpû i te hoê haapiiraa Bibilia, e oaoa rahi atu â tatou i te tauturu ia vetahi ê ia haere na nia i te eˈa e tae atu ai i te ora.—Mat. 7:13, 14.